Ka KSU Khliehriat Town Unit waka Ladrymbai Unit haka 8 tarik da lai yachem ki wa u Additional SP ka East Jaiñtia Hills, u Banraplang Jyrwa uwa man leh uwa pait yaka chnat Traffic yow yaklam hajrong i joor palat i sahkut kari ha yaaw Ladrymbai wa ha yaaw Khliehriat nadooh i step, i sngi hadooh janmiet iwa da jia man-ka-sngi.
Neiliang ka KSU EJHDU ha kini ki kajiak bnai wa da dep, da dep lai e dorkhat ko yow pynsñiaw cha u Montri ka chnat kaam pohyung, u Prestone Tynsong yow wanrah da ka Traffic Branch hapoh District khnang yow ye u pynbait yei rukom pynlai kari, tangwa hadooh katni ka sorkar ym em leh ko iyi iyi hajrong ini i dawa ka seiñ.
Kamtæ ha ini i yaklam wa u Additional SP, da khana u wa ya kani ka phang neiliang yong ki kam ki pulit leh da jooh dawa ki yeini i jooh.
Ka seiñ da e buit ko yaka Traffic Cell wa toh u pynmih hukum yow pynlai noh ya ki Truck wa thylli na Ladrymbai Bypass lyngba ka yung krehkaam ka PWD khnang yow lait nei sahkut kari heipor sngi ha Ladrymbai wa Khliehriat iwa da ktah sakhiat ya ki paidbah wa ki khynnah skur wei khamtam ya ki kari Fire Brigade wa ki Ambulance kiwa emkaam ya ka luti kawa kyllooid yow ye ki wow leh yei kaam yong ki yow lait nei jia iwa sñiawsih.
Yeini ka seiñ da ong ko wa toh u leh deiwa pyrchang donhi lada man i iwa krehkaam.
Ka seiñ da ban joor ko yei emkaam wow em ka Traffic Branch hapoh ka District khnang wa ki paidbah ka thaaiñ ym chah ktah ki.
Discussion about this post