Ki bor ka Kamrup District, Assam da pynmih ki ya ka aiñ ‘No Helmet/Seatbelt, No Fuel’, deiwa phah ya ki Petrol Pump wow kyntait u e phñiang cha kiwa yah thuk-thuk khlem Helmet wa kiwa yah kari khlem deiñ Seatbelt.
U District Magistrate, u Deba Kumar Mishra da pynmih u ya kani ka hukum hapoh ka Section 163 ka Bharatiya Nagarik Suraksha Sanhita (BNSS) heiwa da khang leh ya ki kari wow psiah na i liang wym toh cha ki Petrol Pump.
Da phah ya ki tre Petrol Pump wow booh yei maham dei Assamese, English wa Hindi wei wow pyndait CCTV Camera hapoh 10 sngi wei u pyntip ya kiwa tyngkheiñ aiñ cha ki pulit namo ka Traffic Branch man-ka-sngi.
Deiwa pynemkaam ya ki Video CCTV daw ye u e ya ki e-Challan pyrchah ya kiwa tyngkheiñ aiñ neitæ ki Executive Magistrate wa ki pulit u pynman ki yei sylli syndet man-i-por.
Daw pynmih leh yei pynsñiawthooh paidbah lyngba ki khubor, ki Social Media wa ha ki Petrol Pump ynñiaw sngi chwa wow pynkrehkaam ya ka hukum.
Ini ym krehkaam i ya ki kari Emergency, Ambulance, Fire Service wa ki kari pulit deilang ki kari wa lai jhan cha ki thaw sumaar tangwa emkaam u pynbiang ki ya ki kot ki sla wa biang.
Ya kiwa pyrchah u pynchitom hapoh ka kyndon Section 223 ka Bharatiya Nyaya Sanhita (BNS) wa kiwi ki aiñ.





Discussion about this post