Shillong: U Executive Director ka National Bee Board, New Delhi, u B.L. Sarswat ynne da yachem u wa kiwa ri ngap ka East Khasi Hills District ha Seminar Hall ka Directorate of Agriculture, Shillong. Da em leh u K N Kumar, Chairman ka Meghalaya Farmers’ Empowerment Commission wa ki sahep ka chnat Agriculture.
I thong i wan u Executive Director ka National Bee Board wa ar sngi toh yow thooh bniah yei rukom ri ngap hapoh ka jylla wei yow e yarap (Technical Assistant) yaka chnat Agriculture yow lai ko cha khmat yow booh yaka Integrated Bee Development Centre (IBDC) hapoh ka jylla, heiwa da mynjur ka sorkar India wow pynlut T. 10 Klur lyngba ka Ministry of Tribal Affairs.
U B.L. Sarswat hawa e u yei klam da ong u wa ka jylla Meghalaya em ko ki laad ki luti wow ku haka ri ngap, tangwa emkaam leh wow pynemkaam ya ka rukom ri ngap kawa katkam ka juk wa katni, deiwa e leh yaka sikai wa biang yei rukom ri ngap yow yoh nong bha. Da pynkynmoo u leh hadooh katwon emkaam ki ngap yow yei ki jait thung wow im kamjooh leh yow im ka jaitbru hi leh waroh kawi, kamtæ da pynchlur u ya kiwa ri ngap wow kreh chitom ki ya kani ka kaam wa bha wa da leh ki.
U K N Kumar won da pyntip u wa nadooh wa sdang yaka Apiculture Mission hapoh ka jylla da leh ya kiwa boon ki kaam wei hadooh katni da em palat 7000 ngut kiwa ri ngap kiwa da yoh ya i sikai neidaw wa i um ngap wa pynmih hapoh ka Meghalaya man ko kawa miat bha hadooh wa da ye wow dai yaka cha baar ri leh.
Da ong u leh wa ka jylla Meghalaya u man ko ka jylla wa nyngkong dooh hapoh North East wow yoh yaka IBDC.
Discussion about this post