Shillong: Uwa e ktien ka AICC u Gourav Gogoi da beiñ joor u ya ka BJP hajrong wa pynbaad ko ya ki MLA ka Congress deiwa ong wa ki toh kiwa baamtooh wei kiwa sih.
Hajrong i mih khubor won wa daw boon ki MLA ka Congress ha kani ka jylla daw yut seiñ ki ha chwa ka election, u Gourav da ong u wa ha ka party lada em iwon iwon i eh ka elaad ko ya ki dkhot wow pynsñiaw ki yow ye u pynbait da ka luti synchaar ka wym leh chilliang.
Da ong u leh wa lada ki MLA ka Congress toh kiwa bamtooh kammon won ka BJP u pdiang ko ki ini, pynyoo wa em mynsien arsap ka BJP lada pdiang ko ya ki.
Da kop u leh wa ka Congress ha Meghalaya daw wan biang ha i bor ha u 2018 neibhah wa ki paidbah ym toh kiwa biej ya ki buit thok ka BJP kawa thmu wow yahbakla ya ki paidbah da ki khubor thok.
Hei yatoh won wa u Sniawbhalang Dhar, u Gourav da ong u wa ka party dang chong pyrkhat ko hei yatoh wa ini neibhah ka party Congress hi ka elaad ko ya waroh ar liang wow pynsñiaw ki yei eh i khoo wa chem kiwa kreh neibynta ka party wei i rai toh katkam ki riti synchaar ka party.
Da ong u leh wa ka BJP da rem bait ko ha ka Election neidaw ki kaam dohmasi iwa da wanrah yei sñiawpher niam hapoh ka ri waroh kawi.
Hei yatoh won wa i chna luti rel da ong u wa ya kani ka kaam ym sñiawthooh bha wei ka AICC wei daw yang ko yei sur kiwa mihkhmat ka jylla.
Discussion about this post