Daw ujor ka AJSU Nartiang Circle pyrchah ya kiwa kreh sorkar wa yalap Election ha Nartiang-Umladang Constituency

Jowai: Ka seiñ AJSU Nartiang Circle hadien wa da chem ko ya ki bru wakreh sorkar, kiwa kreh District Council, ki wakreh ha Block, yungkrehkaam u DC wa kiwi kiwi ki chnat sorkar waphær waphær da yalap Election ki ha Nartiang Umladang Constituency.

Neiliang ka seiñ da ong ko wa daw ujor ko pyrchah ya kini ki bru wei da kyntu ko ya u DC wow chimkhia u ya ini wow rah chadooh u Chief Election Officer ka jylla.

Ka seiñ da dawa ko leh na ki bor ka aiñ wow kem ya ki bru sorkar kiwa yalap Election hapoh kani ka Constituency.

Neiliang ka seiñ da kular ko wow wanrah ya ki sabut wow pynsakhiat ya ini i kaam, da pyntip u Chief Organising Secretary u M. Mukhim.