Ka seiñ kiwa yah Truck wa ki tre Truck ka jylla wa tip kam ka Meghalaya Commercial Truck Owner and Driver Association (MCTODA) Jaiñtia Hills Unit, ynne ka sngi da chong yalang ki ha Infinity Conference Hall, Jowai neibynta u pyrkhat yei kaam kit kaam bah kamjooh leh ka dor ka mur ha ki kharkhana pynmih Cement, Clinker wa Coke hapoh ka jylla neibhah wot hadien wa da em ka rai wa da mynjurlang hakhmat u DC ka East Jaiñtia Hills District leh, kini ki karkhana ym em pynkrehkaam ki ka hadooh katni.
Hadien ka yalang, neiliang kiwa yahkhmat kani ka seiñ wa kynthup ya u Ardonki Talang, Adviser MCTODA Jaiñtia Unit, u Kmen Myrchiang, dkhot ka MCTODA ong ki wa kam kiwa chong chnong ka jylla kwah ki wow yoh byntalang hei khih mylla, i kit ya ki mar wa mih napoh ka jylla, kamjooh hei dor wa biang kamwa da booh da ka sorkar neibynta i bai kit hapoh ka jylla, tangwa ki kharkhana won ym em pdiang ki næ pynkrehkaam namo wow e iwon iwon i jubab.
Ha kani ka yalang ong ki wa da chim ki ya ka rai wa lada i dawa yong ki ym mankaam ki hapoh uni u bnai kamwa da ya pynbaitlang, ye ki wow chim rai wow pynman syndon dei yakhih.
Ong ki leh wa hei sakhiat katkam i yasoi soskular wa ki karkhana, boon ki khih ki kreh toh u e cha kiwa chong chnong ka thaaiñ tangwa tang 20% leh ym em yoh ki.
Kamtæ kyntu ki ya ka sorkar kamjooh ki tre karkhana Cement wow chimkhia wei burom ki yei yeiwa da yaklam wei railang.
Discussion about this post