Shillong: U montri kaam pohyung ka Meghalaya, u Lahkmen Rymbui da pyntip u wa katkam ka yutip wa da yoh, i lai ki chipai ka 11 Gorkha Regiment cha Langpih da leh ki katkam i kaam yong ki (Duty) neibhah wa ka Assam da pynkrehkaam ko ya ka Armed Forces (Special Powers) Act (AFSPA). Tangwa u Montri da ong wa hadooh katwon ini man i iwa sakhiat ym ye wow pyntikna.
Da ong u wa ini i leh yong ka Assam ym ye wow pynbaad iyi iyi katwa ym pu tam ya u pood cha Meghalaya, tangwa da pynrap u wa ka sorkar da leh ko ya i kamram wow pyntikna yei chong chngaaiñ ya ki paidbah ha katai ka thaaiñ.
U Rymbui da pyntip u wa i yaklam wow pynbait yei eh ha ka thaaiñ Langpih dang em ko hadooh katni hapyrdi ki bor pynlai District yow lait u mih iwon iwon i jia wa ktah ya i suk i saiñ.
Hawa kylli, lada em ka yutip chwa da ka sorkar Assam chwa wa daw pynlai ya ki chipai cha ka thaaiñ wa em i jia ha khappood, u Rymbui da pyntip u wym em iwon iwon i yutip, tangwa da ong u wa ka Assam toh u yieñ ko hajrong ka soskular Status Quo wow burom markylliang.
Kam wow kdaw heini wa hadien i jia i kajia iwa da mih na i thmu yong ki pulit Assam wow booh ya ka Outpost ha ka thaaiñ Umwali, Langpih, kiwa chong chnong ka thaaiñ da pynkhreh ki wow yakhun pyrchah wei wym elaad ya i thmu yong ka Assam, tangwa ynnin ka sngi ka Assam da phah ko da ki chipai wa kamwa 100 ngut ki pulit wow pyntieñ ya ki paidbah ha khappood.
Hawa kylli, u Rymbui da ong u wa ki pulit Assam ym em hok ki wow yakhun ya ki paidbah kiwa khlem ki tiar yaleh, wei lada em kam itæ toh bait wow pynrem.
Ha iwi i liang u montri da ong u wa i yaklam hapyrdi ki ar ngut ki Chief Minister daw pynman smat noh yaka yow pynbait noh smat ya ini i eh, tangwa hap wow pynbait ya i por kawa biang da ki ar jylla.
Discussion about this post