Daw yaleh u Sanbor Shullai wow chna ya u mot wa chi rynyieñ u Kiang Nangbah hajan ka KNGC

Ka Kiang Nangbah Ïasiat Khnam Memorial Society kamwa jooh kynmoo warom ko khlieh u snem ha ka 30 tarik u December ya ka lyngkhooh sngi yap u Kiang Nangbah, u Khlawait ka Ri-loom Jaiñtia, ha uni u snem leh da kynmoo warom biang ko ya ka lyngkhooh sngi yap wa 163 yong oo kawa da pynman ha Kiang Nangbah Memorial Park wa em ha madan Madiah Kamai Blai, Syntu Ksiar, ka thaw wa em u mot wa chi rynyeiñ u Kiang Nangbah.

Ha kani ka sngi kynmoo warom, u Montri ka chnat Arts and Culture ka sorkar jylla, u Sanbor Shullai da wan emlang u kam u kongsan, hei emlang u Dolloi ka Elaka Jowai, u Puramon Kynjing, kiwa ksohkaam ka Kiang Nangbah Ïasiat Khnam Memorial Society, kiwa chah khut sñiawbha wa kiwi najrong ki paidbah wa boon.

U Sanbor Shullai kam u kongsan hawa klam da yaroh u ya kani ka Society ka wym jooh dam u kynmoo warom ya u Kiang Nangbah da boon ki snem, najrong wa yaroh u leh ya ki kaam wa khroo u Kiang Nangbah.

Neibynta kani ka Society ong u ym pu nood u wow kular iyi iyi leh kattæ, heiwa da kyntu u ya ki u phah chwa ki dei thoh cha oo yeiwa emkaam ki khnang yow pait bniah u iyi wa ye u leh.

Ha kani ka sngi da pynkynmoo haroh u wa ha ki snem nachwa da em i lai pait u ya ka thaw yong ka chnat Transport mar pyrchah ka Gate ka Kiang Nangbah Govt, College Jowai yow tipmit kam ka Kiang Nangbah Square dei wow chna leh ya u mot sahnam wa chi rynyieñ u Kiang Nangbah ha katai ka thaw.

Ong u wa ha kitai ki por ksoh u kam u Montri ka chnat Arts and Culture wei da e u i mynjur wow leh yeitæ, tangwa poi noh ka Election wei ym em de yoh u man Montri sorkar, kamtæ ha kani ka kynti won wa da yoh man Montri biang ha kani ka chnat da booddien biang u wei da khut yachem yumut u leh wa u MLA ka thaiñ, u Wailadmiki Shylla uwa man leh katni kam u Montri sorkar.

Related posts

Chah pyndam kreh u DGP ka Karnataka hadien wa mih i Video khlemakor

January 20, 2026

I pyntip wa emkaam cha kiwa pynemkaam da ki kari kamai Sumo na Jowai

January 20, 2026

Kamtæ khut kyntu u i yakrehlang yong kiwa yahkhmat chnong wa ki paidbah neibynta u lai chakhmat ya kani ka kaam.

Najrong i klam u Sanbor Shullai da yoh leh i klam na u Jait Daoo Sumer, Treasurer ka seiñ Ïasiat Khnam Memorial Society, na u R. Rq Laloo, EC Member wa u Dolloi ka Elaka Jowai, u Puramon Kynjing kiwa da pynsñiaw yei lai luti u Kiang Nangbah kam u khlawait wa yaleh pyrchah nei wan synchaar embor ka sorkar pharæng, heiwa da pynkynmoo haroh u yei kyntien khaddooh wa klam u chwa wa khlaad ha u tylle pasi deiwa ong u, lada i khlieh u u kyruiñ i cha mihsngi hapoh 100 snem ka ri u yoh laitlooid wei ini da jia sakhiat i kamwa klam u.

Chwa ini da em i booh syntu ha u mot u Kiang Nangbah wa em ha kani ka thaw.

Wei najrong i chaad i rwai da em leh i saam khusnaam cha kiwa jop ha ki yakob waphær waphær wa da pynman ha ki sngi wa dadep.