Jowai: Ka All Jaiñtia Youth Welfare Organisation (AJYWO), Central Body, da dawa ko na ka GR Infra Ltd. (GRIL) ka Company wa pynkreh ya u sarok NH-6 nadooh Sumer, West Jaiñtia Hills District hadooh Malidor, East Jaiñtia Hills District wow thoh pynbait noh ya i thoh-dak bakla ya ki pyrtuid ki chnong ha ki Signboard wa boon wa pynyieñ ha tymbud u sarokbah NH-6.
U MH Dkhar, President ka AJYWO Central Body, da ong u, “I thoh dak bakla ka GRIL ya ki chnong ki thaw wa ki thaw yong i, da ktah ko ym du i sñiaw ki tre chnong tangwa da ktah i ya ka pateiñ ka wow wan wei daw yah bakla ko leh ya kiwa lai wa wan na uni u sarok”.
“Hawa em i bakla, i pynbait leh toh u em i. Hawa ka GR Infra Ltd. bakla ko wow thoh yei pyrtuid ki chnong ha kiwa boon ki signboard wa pynyieñ ha tymbud u sarokbah NH-6, toh u pynbait noh ya ki wut wut wei lada ym pynbait, mut i wada leh chanam ko yeini, ya iwa ka AJYWO wa ka jaitbru ymye ko wow pdiang yeini la man katwa man leh”, da pynrap chooh chooh u MH Dkhar
Heiyatoh wa ini, ka AJYWO da ujor ko cha u Deputy Commissioner ka East Jaiñtia Hills District, ha ka 23 Wisu uni u snem, wei u DC da phah u ya ka GRIL wow pynbait noh yeini i bakla tangwa hadooh katni kani ka Company ym em pynbait ko yeini.
Chooh chooh da ong u wa kattu da boon bnai wa neh ki Signboard kamni wei heithaw wow pynbait yeini da mih won da ki rong yong ha kini ki signboard deiwa kylli wa cheiwon wiar ki pyrtuid ki chnong ki thaw ha ki Signboard.
Kamtæ da kyntu ka AJYWO ya ka GRIL wow burom yei hukum u DC wei wow pynbait yei thoh pyrtuid bakla yong ka ha kini ki Signboard.
Also Read: Tympleh ka HANM – EJH yeiwa thoh bakla ka Company GRIL yei pyrtuid ki chnong hapoh ka EJH
Discussion about this post