Ka seiñ Federation of Khasi Jaintia and Garo People (FKJGP) Jowai Circle, haka kyrwoh wa da phah lyngba u President u D. Challam wa u General Secretary ka seiñ da dawa wei da dep leh wow lai e dei thoh cha u Branch Manager yong ka State Bank India, Jowai Branch neibynta wow dawa booh yaka ATM ha ki thaaiñ yong ka Chilliangraij, Jowai.
Neiliang kiwa yahkhmat ka seiñ da ong ki wa i em ka ATM ha katai ka thaw ym du wow pynsuk ya ka chnong Chilliangraij kamjooh ya kiwi ki thaw wa em chajan kiwa daw yoh yarap.
Da ong ki leh wa ki bru katai ka thaaiñ du neibynta wa emkaam poisa hap ki wow lai chaddooh cha yaw iwa da pynlut yei por wa ka bai kari yong ki.
Kamtæ neiliang ka seiñ hadein wa da dep ko wow yachem ya u Branch Manager ka SBI, Jowai hajrong ini i dawa, da pynkynmoo biang ko yaka Bank wow chimkhia ya ini i kaam kawa man neibynta i myntoi ki paidbah.
