Shillong: Ka KSU South West Khasi Hills District da dawa ko naka sorkar wa toh u chna sa kawi ka Community and Rural Development Block ha South West Khasi Hills District ha Umdohlun. Neiliang yong ka seiñ da ong ki wa lada ka sorkar em sakhiat ko i sñiawkhia ya ki paidbah kani ka thaiñ da toh wow booh ya kani ka C&RD Block ka wow yarap ya ka thaiñ nadooh Mariem, Warsan Lyngdoh, Phlangdiloin wa kiwi kiwi ki thaw wa haap hapoh kani ka thaiñ.
Man i por da dep yachem waka Sorkar, ya kiwa mihkhmat hadooh ya u Dr. Mukul Sangma uwa jooh ong ha khmat ka seiñ wa kwah u wanrah yaka roi ka paar cha kani ka thaiñ, neini i daw da dawa naka sorkar wow kynmoo ko yei kular yong ka.
Kamwa man kattæ , ka South West Khasi Hills District em ko du ar tylli ki C& RD Block kawi ha Mawkyrwat wa ha Ranikor Block. Ka seiñ da ong ko wa ymtoh iwa suk ya ki paidbah wow poi cha kini ki thaw neibhah wa jngai ka thaw wei em leh kiwa haap lai dei kjat boon kynta hadooh katni.
Ka seiñ da kyntu ko ya u MLA yong ka Mawkyrwat Constituency u Rowell Lyngdoh, u MDC ka Mawkyrwat Constituency u Hadrian Lyngdoh, u Martin M. Dango MLA Ranikor Constituency wa u Manstudy Nongrem MDC wow chimkhia ki yeini wow pynkha Block ha Umdohlun kawa man leh ka dawa ki paidbah da boon snem.
Kani toh katkam ka khubor na u Forwardman Nongrem, President, KSU SWKHD.
Discussion about this post