Ka EJNC da pynsñiaw ko yei sñiawlyngngoh wa i sñiawsih wa khroo hajrong i siat yap ki pulit ya u Cherishsterfield Thangkiew, General Secretary warim ka HNLC ha yung sah yong oo ha Mawlai, Shillong ynnin i step synyaw heipor kamwa 3:00 waje.
Ka seiñ da ong ko wa ini i leh yong ki pulit da pynchrai ko ya ki paidbah wei da pynchong sier leh ya kiwa ha yung hasem wei kamjooh ya ki khon ki kti yong u Cherishsterfield, da pynsñiaw leh i lyngngoh wa ileh ki pulit da rahlang ya ki 2ngut ki khon yong oo.
Hajrong ini i jia, neiliang ka EJNC da beiñ ko ya ka chnat pulit kiwa tyngkheiñ ya i hok manbru (Human Rights) wei da dawa wow kem ya uwa siat ya u Cherishsterfield.
Ha i jooh i por ka EJNC ka dawa ko na u Home Minister, u Lahkmen Rymbui wa toh u pynche u hajrong i yohbor ki pulit wow siat ya u Cherishsterfield ha yung wa sah u hakhmat ki khon ki kti yong oo, “I sñiaw i wa lada u Home Minister um ye u wow pynche hajrong ini, bha ya u Lahkmen Rymbui wow hiar chuki noh u kam u Home Minister ka sorkar jylla.”
Ka EJNC da dawa ko leh naka sorkar jylla wa ka toh u thung noh ko daka CBI Enquiry hajrong ini i jia khnang yow che wei yow mih pyrthai.
Ka EJNC da phah ko leh ya ka khubor sñiawlem cha kiwa hayung hasem yong u Cherishsterfield, wa u Blai uwa booh wa thaw u pyntngen u ya ki khon ki kti wa yaka yung ka sem hi waroh kawi.
