Dawa ka AJYWO na ka JHADC wow khang ya ki dukan khlem Trading License

Jowai: Lyngba ka yutip wa yoh na ka RTI, dang ha kini ki sngi da u Reachingson Siangshai, uwa man leh u Vice President yong ka AJYWO Central Body na ka JHADC hajrong ka khayi yong ki wym toh ki bru loom næ Non-Tribal hapoh u pood u ang yong ka JHADC lyngba ka Taxation Office yong ka, da pyntip wa da em hadooh 2785 tylli ki Trading License kiwa dang krehkaam (Valid Trading License) hadooh ka tarik wa da paan yutip, tangwa iwa phylla won wa i thooh bniah yong ka seiñ da chem wem du 321 tylli ki Trading Licence kiwa da pynthyme wa dang krehkaam (Renewed up-to-date) hadooh ka tarik wa thooh yutip.

Ka seiñ da ong ko wa em i yaphær iwa e yutip ka JHADC na ki RTI wa da yoh neibhah katkam wa e yutip ka JHADC, lada kheiñ wa em hadooh 2400 tam tylli ki Trading License, i wym che won wa iyi i daw wym wan pynthymme de ya ki.

“Kammon u ye u man hawa pait ya ki dukan wa i wan kamai ki baar jylla hapoh ri-loom Jaiñtia u poi ki da ki phaw hajar tylli wei katwa dang lai ki sngi ki dukan dang boon ki katwa i em ka kiwa yoh Trading License dang suna chooh chooh ko katkam wa pyntip ka JHADC,” ong u MH Dkhar President yong ka AJYWO Central Body.

“Katkam wa chem naka RTI, i wym pynkrehkaam pura ka JHADC ya ka aiñ wow kdoh u khoom ya i wan khayi ki baar jylla hapoh u pood u ang yong ka JHADC, da wanrah ym du i dooh nong wa khroo ya ka JHADC wei da ktah ko leh ya ki tre jylla,” ong u Reachingson Siangshai, Vice President yong ka AJYWO Central Body.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da ong ko leh wa i boon ki baar jylla kiwa wan wo seiñ khih hapoh i chnong ki thaw ki yaaw ki haat ka JHADC kammon won duna ki Trading License wei ini pynyoo wa waroh chi kattu yohthiah ka JHADC heiwa kiwa wan seiñ khih toh kiwa leh pyrchah ya ka aiñ.

Ka seiñ da ong ko leh wa daw thooh yutip chooh chooh ko ya kini ki baar jylla kiwa wan seiñ khih cheini lada kiwa kreh yong ki em ki ya ka Employees’ Service License.

Ka seiñ da ong ko leh wa ym chong kli kti ko wei u thooh bniah ko wei u lai ko chakhmat hadooh wym em u wi leh u baar jylla wow seiñ khih hapoh u pood ri-loom Jaiñtia pyrchah ya ka aiñ.