Jowai: Ka AJYWO deiwa pyrkhat yei chah tyllep na ki jaitbru wa heh paaid, i suk palat u psiah u mih cha ka jylla kawa daw booh yei maa kawa khroo ya ki pateiñ wow wan, da dawa joor ko naka sorkar jylla wa ka toh u pynkrehkaam syndon ya ka Meghalaya Residents Safety and Security Act-2016 khlem da booh teiñ de.
Ka seiñ da sñiawlyngngoh ko hadooh kattæ kattæ hawa katni hadien 3 snem pura wa da dep chna yaka Meghalaya Residents Safety and Security Act-2016, wei hadien 2 snem pura leh ym pu em chna ya ka Meghalaya Residents Safety and Security Rules-2017, iwa ka seiñ da sñiaw ko wa ka sorkar yoh thiah ko wow pynemkaam ya kani ka aiñ wow pait yei wan chong chnong ki baar jylla.
Ka AJYWO da ong ko leh wa hadien i chah kyntait yong ki 19 lakh tam kiwa chong chnong ka Assam na ka NRC, wa i yoh kem ya 17 ngut ki nong Nigeria da ki pulit ka EJH kiwa psiah tooh chapoh ka ri wei kam kini ki jia toh u pynkhyrngiat ko yaka sorkar kammon wow yada ya ka jylla deiwa pynkrehkaam yaka aiñ MRSS Act wei wow thooh leh sa kiwi ki laad ki luti wow yada ya ka jylla wa kiwa chong chnong wa khian paaid yong i.
Ka AJYWO da pynsñiaw ko leh yei sñiawkhia kawa joor hajrong i wym pyndep de ka sorkar jylla ya ki Entry & Exit Points wa da mang nadooh ki snem wa da dep, i wym ye ka sorkar u pynkrehkaam ya ka District Task Force kawa da prooid dak katkam ka Section 5 yong ka MRSS Act-2016.
Discussion about this post