Jowai : Katkam ka khubor wa da pyllait da u President ka AJYWO Central Body ka pynsñiaw ko yei sñiawkhia iwa joor hei yatoh wei yohlad wei chim kabu yong ki barjylla wow chna wei wow pynyieñ dukan tyngkheiñ aiñ ha waroh arliang ki rood surok yong u surok bah NH 44 ha Lad-Rymbai khamtam ha Lad-Rymbai Khlieh Dupon kat hadooh wa da booh ka i ma wa khroo ïa ki paidbah wa lai yaw lai hat wei wow lai emkaam dei kjat lyngba kani ka bynta hajrong wa uni u surok man u uwa da sih.
“U surok NH 44 man u, u budloom wei u thied snaam yong ka lai ka wan yong ki paidbah ka thain Cheitai-Cha-Mihsngi yong ka ri India waroh kawi. U NH 44 man u leh uwi na ki surok bah (National Highway) wa boonkaam (busy) tam ha kani ka thaaiñ North-east India waroh kawi neibhah da ki phaw hajar tylli ki kari ha ka chi sngi nadooh kiwa khian hadooh ki waheh hap lai luti ki lyngba uni u surok” da ong u ma M H Dkhar President ka seiñ.
U ma Dkhar da ong chooh chooh u wa uni u surokbah lai u lyngba ka chnong Lad-Rymbai Khlieh-Dupon, wei pyn arliang ki side-berm yong uni u surok da khyrrup wei da chna dukan tyngkheiñ-aiñ da ki barjylla hadooh wa da wiar wavki luti kjat (footpath) narood uni u surok. Ini da pynbor i ïa ki paidbah wow lai na pyrdi uni u surok iwa booh ïa ki hei ma wa khroo.
Kamtæ hei yatoh wa ini ka seiñ AJYWO da dawa ko na u Deputy Commissioner yong ka East Jaintia Hills District wow tympra noh ïa waroh kini ki dukan yong ki barjylla ha waroh arliang yong kani ka surok wei wow pynchitom noh ïa ki katkam ki kyndon aiñ.
Hei jooh i porj, ka seiñ da dawa ko leh na ka JHADC wa ka tnad Labour kamjooh leh ka tnad PWD (NH) yong ka sorkar wow chim khia ki yeini.
Discussion about this post