Ynne ka sngi ka West Jaiñtia Hills District Congress Committee (WJHDCC) da pynman ko yei lai paidbah ha Jowai nadooh na New Hill lyngba ka Iawmusiang hadooh wa poi ha Madan Datlawakor (Stand War) wow dawa kem noh ya u Chief Election Commissioner ka ri India, u Gyanesh Kumar.
Ya ini i lai paidbah da yahkhmat da u MDC ka JHADC uwa man leh u President ka WJHDCC, u Rikut Parien chirup i emlang u MDC uwa man leh u President ka Jowai Block Congress Committee, u Madonbai Rymbai.
Hawa e i klam hadien i lai paidbah ha Madan Datlawakor, u Rikut da ong u wa ya ini i lai paidbah wa jai-jai da pynman jhan deiwa bood ya ka hukum ka All India Congress Committee.
U Rikut da ong u wa u Kumar da pynemkaam bakla u yei bor yong oo wow pynkylla ya ka SIR deiwa phah ka sorkar BJP ha Delhi heiwa da pynpsiah yabor ya ki pyrtuid ki bru wym em ha ki jylla ha ki Electoral Roll hawa leh ya ka SIR.
Da ong u wa ini i leh man i wow yoh myntoi donhi ki kattu katni Party kiwa em hei bor.
Neiliang u Madonbai Rymbai da ong u wa da em ki Election Commissioner kiwa da ujor pyrchah ya u Kumar heiyatoh wa ka SIR.
Da ong u wa kammon ka jooh ka bru na baar ri u mih pyrtuid ko ar sien ha ka Electoral Roll iwi ha Uttar Pradesh wa ha Maharashtra deiwa kyntu ya ki seiñbhalang, ki Party, kiwa mihkhmat paidbah wa kiwi wow ksohktilang wow dawa pynhiar næ kyrriah noh ya u Kumar kam u CEC.
Ha kani ka sngi da yoh leh i klam tbian na u General Secretary ka WJHDCC, u Eklis War.
Discussion about this post