Ki dkhot ka ECC Sutnga Elaka hawa yaklam wa kiwa thoh khubor ynne ka sngi da ong ko wa ha ka 10 tarik uni u bnai, ka NGT da pynmih hukum ko yow phah ya ka MSPCB yow chim yukheiñ ko yei chah ktah ka rymaw yow leh iyi re iyi yow khang yeini wei kamjooh wow pynchitom ya ki karkhana hadien wa da yaleh mukotduma ka ECC pyrchah ya ki karkhana Coke.
Ka ECC da khut ko ya kitu kiwa chah ktah wow wan ki chakhmat wow ujor yow yoh ki ya bai lutsan deiwa lai ujor bait cha ka MSPCB lane deiwa lai lyngba naka ECC.
Da pyntip leh wa ka NGT da pynmih hukum ko wa ka MSPCB toh u lai pait lai sylli ko dei langær miet wa sngi wei toh i kaamram ka MSPCB wow pynchitom ya ki karkhana Coke wa tyngkheiñ ya ki kyndon aiñ.
Kamtæ ka ECC da dawa ko na ka MSPCB wow phah syndon ya ki bru yong ka yow sah ki chi bnai ha Sookilo, Umpleng wa Umtyra yow pait yei rukom krehkaam kini ki karkhana Coke kiwa da pynmih ya kiwa boon ki jakhlia wa ktah ya ki chnong ki thaw wei ka MSPCB toh u booh ko leh da ka u Number wa ye ki bru wow Phone ha iwon iwon i por.
Ka ECC da pyntip ko leh wa da em 29 tylli ki karkhana Coke ki wym yoh bor tang u chna leh na ka MSPCB wei kiwi won da khang ki dei bor yong ki hi kamtæ da dawa na u Montri Rangbah yow phah ya ka MSPCB wow pynmih hukum ko wa waroh kitu ki karkhana kiwa da chna khlem da yoh bor wow tympra noh ki.
Hajrong ki thaw wa da pynyieñ ya kini ki karkhana, ka ECC da dawa ko na ka MSPCB wow khana thij yei thaw wa em kini ki karkhana neidaw wa ka M/S Syrpai Coke waka M/s Jaintia Coke Industries kiwa em hapoh ka chnong Sookilo kawa da tipmit da ka JHADC kam ka chnong tangwa kini ki karkhana won da thoh ki wa ka Sookilo toh ka thaw pynman yaw ym toh ka chnong wa sah ki bru iwa da yahbakla tangwa hawa paan bor naka Single Window Agency (SWA) won da thoh ki wa kani ka thaw toh ka chnong.
Ka M/s Mahajong Coke LLP, ka M/s Khlieh Umim Coke, M/s Ioannis Industries Pvt. Ltd, ka M/s Kantalo Coke waroh toh kiwa em hapoh ka chnong Umtyra harood ka sarokbah kawa dang man hi hapoh ka chnong Umtyra.
Ka M/s N.M. Fuels kawa em ha Moolamylliang hapoh ka thaw wa sah ki bru tangwa kani kawa da dep phah khang chisien da u District Magistrate ka East Jaiñtia Hills neidaw wa da pynkrehkaam khlem yoh ya ka CTO wei da chna khlem da yoh ya ka CTE tangwa ka MSPCB da e bait ko ya ka CTO yow krehkaam, neiliang ka ECC da paan ko yei pynche.
Ka ECC da kylli ko leh ya ka MSPCB yei daw wa ya ka M/S Jaintia Coke Industry Chimney II wa em ha Sookilo waka M/s Meghalaya Coke Chimney II wa em ha Pather Umpleng wym em kyntait wow e CTE yow sdang u chna kamwa da kyntait ya kiwi tawan.
Da ong wa ya kani ka M/s Jaintia Coke Industries Chimney II wa em ha Sookilo da phah khang ya ka neidaw wym em ko ya ka CTE kamjooh ya ka CTO tangwa ym em won kyntait yei paan bor ko wow sdang neibhah kani ka karkhana toh kawa da sdang wow chna khlem da yoh bor wei kini ki ar tylli ki karkhana dang booh chwa charood yei paan bor namo ka Application yong ki hanla da paan ki ya ka CTE khlem da yoh ya ka SWA neibhah ya kiwi da kyntait bait ya ka Application yong ki katwa ya kini won ym em leh kamwa leh ya kiwi kamtæ da dawa wow e yei pynche naka MSPCB.
Kamtæ ka ECC da ong ko wa lada ka sorkar e bor ko ya kini ki karkhana daw ktah wei daw booh ko yei maa ya ka Elaka wei kiwa chong chnong daw mih madan biang ki deiwa khor lada ym bna ka sorkar.
