Ka EJNC da dawa ko na u DC ka East Jaiñtia Hills wow pynman daka takit yow chem neiwon wan u mooyong wa pynemkaam ha kiwa boon ki karkhana Coke Factory hapoh ka District deiwa ong wa ha kini ki snem wa da dep, da mih boon tylli kini ki jait karkhana kiwa thang mooyong heiwa da em ki palat 10 tylli kiwa da seiñ hadien wa yoh bor naka sorkar jylla.
Ka seiñ da ong ko wa em na kini ki karkhana kiwa dang chna wei dang em leh kiwa dang chna wei emkaam leh wow tip neiwon kini ki karkhana yoh mooyong ki.
Ka seiñ da kdaw ko leh wa ka NGT da khang ko yei tih mooyong hapoh ka jylla lada ym bood yaka aiñ MMDR Act. Deiwa pynrap leh wa hanla ka sorkar ong ko wa ym em i tih mooyong pyrchah yaka aiñ, da pynphylla ko kammon krehkaam kini ki karkhana lada ym em wa tih mooyong hapoh East Jaiñtia Hills District.
Kamtæ ka seiñ da ong ko wa kini ki karkhana ye u man wa da yoh ki ya u mooyong uwa da pynmih pyrchah yaka aiñ neibhah wa kini ki karkhana da yoo wa ym em thied mooyong ki na baar ka East Jaiñtia Hills District wei ini da man ko i dooh nong yaka sorkar lada pynemkaam ya u mooyong pyrchah yaka aiñ.
Hajrong ini, ka seiñ da dawa ko wow pynman yaka Magisterial Enquiry kawa toh u sdang hapoh 14 sngi yow chemdien neiwon yoh mooyong kini ki Coke Factory ha East Jaiñtia Hills District.
