Ka Federation of Khasi Jaiñtia & Garo People (FKJGP) Laskeiñ Block Circle hadien wa da yoh ko u yoo ya chiboon i eh yong ki paaid kiwa pynemkaam ya ka Rural Bank kawa em ha Mowkaiaw heiwa da yoo dei khmat yei boon ki bru khamtam ha sngi yaw Mowkaiaw heiwa kani ka chnong da man ko leh kawa man pyrdi wa kiwi ki chnong kawa da chakri ya kiwa boon tylli ki chnong nadooh kiwa jan chnong wa na ka thaaiñ khappood kam ka Moolber, Psiar, Khatkasla wa kiwi de.
Kamtæ ini i boon palat ki bru da ktah jur ko ya kiwa jngai chnong, kiwa bah khon, wa ki tymmen kiwa da hap yieñ laiñ ki leh boon kynta wow pyndep ya i kaam wa khian tam.
Hajrong ini, neiliang yong ka seiñ ynnin ka sngi da lai e chithi ko ha u Branch Manager ka Meghalaya Rural Bank Mowkaiaw wow dawa booh ya kawi ka kor ATM ha kani ka thaw khnang wow pynsuk ya ki paidbah kiwa lai emkaam khamtam hawa emkaam jhan wow sai poisa.
Neiliang u Branch Manager kani ka Bank da kular u wow chimkhia u pynsñiaw cha kiwa toh u pait khnang wow pynsuk yeiwa emkaam yong ki paidbah ka thaaiñ waroh kawi.
