Khliehriat: Ki ar tylli ki chnat krehkaam ka seiñ Federation of Khasi Jaintia & Garo People (FKJGP), kiwa em ha ki thaaiñ khappood ka East Jaintia Hills lyngba u sarok Rymbai Bataw Borkhat Jalalpur (RBBJ) Road, kitæ toh ka FKJGP Bataw Unit wa ka FKJGP Pynurkba Unit, ynnin ka sngi 01-04-2020 hei ya emlang wa u MDC ka thaaiñ u Dr. Sanky Shangpung da lai yachem kyrpang ki wa u Deputy Commissioner, EJHD u FM Dopth, deiwa e dei thoh hajrong ka Lad-Lakadong Anti-Dacoity Camp kawa da wai nadooh u bnai May 2016.
Kani ka kynhun da ong ko wa toh u pynkrehkaam wut wut ya kani ka Camp khnang wow khanglaad ya ki bru kiwa em ha khappood yong ka ri Bangladesh u psiah tooh ki chapoh ka District kamjooh hapoh ka jylla Meghalaya. Neiliang u President ka FKJGP Bataw Unit, u Deihok Sumer da ban joor u yei emkaam ya ka sorkar u chimkhia ko yei dawa ka seiñ neidaw kam wa man hadooh kattæ ka sorkar ym pu ye ko u pyndep yei kær narchieh ya ki bynta ka thaaiñ khappood hapyrdi ka India wa ka Bangladesh, katwa kamtea kam ha kini ki por wa ka pyrthai ha ki ri waphær waphær yap ki bru na ka khlam u COVID-19, lyngba ki khubor ka ri Bangladesh leh man ko ka ri kawa da poi kani ka kjut.
Ka seiñ sñiaw syier ko wa ki dkhar Bangladesh thooh laad ki wow psiah cha ka jylla wa maya yong i kawa dang emlang u Blai chirup kamwa man hadooh katni ym pu chah u Blai u em kani ka kjut ha ka ri wa tip bru tip Blai. Hanla Kamtæ leh, ym ye u len wa em kiwa dai ri wow man ki wow yahluti ya ki dkhar Bangladesh wow psiah tooh ki chapoh District lyngba u sarok RBBJ Road.
Yeini ka sein da ong ko kamwa man hadooh kattea, kiwa chong chnong kiwa em yung ha tymbud sarok, kam ha kini ki por Lockdown ka sorkar dang em ki kari wa sñiaw kiwa chong chnong wa lai ter ter heipor miet kawa pynsuba sih joor ya ka seiñ wa ya kiwa chong chnong ka thaaiñ watoh ki kari kit dkhar Bangladesh wow pynpoi ya ki cha ki thaaiñ Ladrymbai, ong u President ka FKJGP Pynurkba Unit u Philip Rymbai.
Heini i pynsñiaw ka seiñ hakhmat u Deputy Commissioner ka District da thoh u leh ya kini ki phang wa da wanrah daka seiñ wei da kular u wow chimkhia deiwa phah u ya kani ka kaam cha ka chnat pulit lyngba u Superintendent of Police wow leh yeiwa emkaam, kyntu u leh ya ka seiñ FKJGP u chimkhia lang chooh chooh u booddien wa ha kiwa hajrong yong oo, kamtæ neiliang ka seiñ da phah Copy ya kani ka dawa cha u Local MLA uwa man leh kam u Minister yow chimkhia u ya kani ka kaam.
U President ka Bataw Unit da ong u leh hei yoh u yaklam wa u Kyrmen Shylla, MLA lyngba ka Mobile Phone da ong u neibynta i bha i miat yong ki paidbah neiliang yong oo u leh u yeiwa emkaam hajrong ki dawa ka seiñ FKJGP. Kamwa pynkymmo wa seiñ heipor wa da dep, jooh yoh kem ko boon ngut ki dkhar Bangladesh wa thmu u ku tooh cha ki thaaiñ Ladrymbai.
U Dr. Sanky Shangpung da ong u wa ka sorkar toh u chimkhia bha ko u pait yei eh ka thaaiñ deiwa pynkrehkaam ko ya kani ka Lad-Lakadong Dacoity Camp khnang wow man kam ka stieh wow yada ya ki paidbah ka thaaiñ ha i yoh laad ki bar ri u psiah cha ka thaaiñ kamjooh ya kiwi tawan ki kaam khayi pyrchah aiñ kiwa em ha ka thaaiñ.
Discussion about this post