Ka Hynñiewtrep Border Dispute Redressal Forum (HBDRF) ha ka 17 tarik da yoh ko wow yachem wa u MP ka Shillong, u Dr. Ricky Syngkon ha Saint Claret Parish Hall wa em ha Phramer, West Jaiñtia Hills yow pynsñiaw yei eh i khoo kiwa chong wa sah ha ki thaw khappood neidaw wym bait u pood u ang wei yei leh embor ka sorkar Assam.
Da e kti leh ya ka dorkhat ha u MP kawa da khana bniah yei hok longtre mantre ki Labang Nangphyllut wa Pangam Raliang (Block-1) heiyatoh wa i khyndaw u chyiap, u pood u ang deiwa pynchong yurim da ki khana pateiñ kiwa yoh na ki waheh wasian kamjooh ki parom wa da em dei thoh namo ki Historical Facts kiwa da chim na kiwa boon ki kot.
Da khana leh yei leh thok leh chukor ka sorkar Assam heipor wa pynkha ya ki District Council ha ki thaw ri-loom ka jylla Assam ha ki snem 1949-50 deiwa ah yabor wei pynyasoh yabor ya ka Elaka Labang Nangphyllut wa Pangam Raliang cha ka United Cachar & Mikir Hills heithaw wow rah hapoh ka United Khasi & Jaiñtia Hills kamwa jooh man nadooh ki por warim wa jah.
Da pyntip leh yei chah lehbeiñ ki Pnar ha ki jaitbru Karbi wa wot ha ki pulit Assam ha ki por ki snem kiwa dadep wa hadooh katni. Da pynyoo leh ya ki chithi sorkar na ka Assam wa da kubur ko yei bakla heiyatoh wa i pynhaap ya ka Elaka Labang Nangphyllut cha United Cachar & Mikir Hills wa ki chithi kiwa phah ko cha ki ar tylli ki District Councils ka United Khasi Jaiñtia Hills wa United Cachar Mikir Hills wow Survey biang ya ki thaw kiwa toh u pynuiñ cha ka United Khasi Jaiñtia Hills wa man ka Meghalaya katni.
Ka HBDRF da kyntu wei kyrpaad ko ya u MP wow chimkhia bha u yeini i kaam wow yaklam ha Parliament wa ki heh sorkar India. Ka Forum da pynyoo ko yei wym chaniah bha wa yei tieñsar yei sorsa yei pynbait pood kini ki ar sorkar Meghalaya-Assam deiwa kdaw wa ka sorkar Assam rap lehbor ko ya ka sorkar Meghalaya kawa teiñslah wei na ini i daw ye u poi chei dooh yei khyndaw u chyiap, u pood u ang katkam wa toh i hok yong ki.
Kamtæ da kyrpaad wei kyntu joor ya u MP wow pynbor u ya ka sorkar bei wow hukum ko ya ki sorkar Assam wa Meghalaya wow pynbait yow pood u ang katkam wa toh i hok kiwa chong chnong.
U MP leh da kular u wow chimkhia yeini i kaam wei daw puræ bniah u ya iwa da e kti ha oo lyngba ka dorkhat khnang wow tip yei sakhiat wei daw khut yachem biang u lada dawa i kaam.
Discussion about this post