Ka HITO Saphai Area da lai sylli ko ya ka Saphai Pohrtiang Government Lower Primary School heiwa da chem chiboon i duna ka yung skur kawa da jæd da pra, ki tin kiwa da pai thlu, ki ben leh dang duna, wei da pynlyngngoh chooh chooh ya ka seiñ toh wa kani ka skur kawa da sdang nadooh u snem 1978 wot ka kamra krehkaam neibynta kiwa sikai leh ym em ha katai ka skur.
Hawa yoh ka seiñ wow yaklam wa ka Head Teacher yong katai ka skur, neiliang yong ka leh da ong wa ki da dep ki wow phah chithi cha ka sorkar wei da em ka skur leh ha ka thup wow pynchna noh tangwa hadooh katni ym pu em pynchna ya katai ka skur.
Da khana leh wa em du soo ngut kiwa sikai ha katai ka skur wei nadooh wa da chong ngiah ka wi na ki ym em thung thymme da kawi kawa sikai.
Kamtæ ka seiñ da dawa ko na ka sorkar wow pynku kyrdan noh ya kani ka skur cha ka Upper Primary wei wow pait leh ya ki skur wa em cha palatsor khnang wow yoh myntoi ki paidbah yow ku kyrdan i puræ puthi yong ki khynnah ka jylla waroh kawi.
