Ka Hynñiewtrep Integrated Territorial Organization (HITO) da thoh ko cha u Lat ka jylla wow kyrpaad ya u Montri Rangbahdooh ka ri wow thung u da ka Committee wa kyrpang wow khlieh da u Montri ki Kaam Pohyung ka ri yow pynkrehkaam ya ka Annexed Agreement wa da soi wei da pdiang da u C. Rajagopalachari, u Governor General yong ka ri India wa ki khlieh synchaar yong ka Federation of Khasi States ha ka 17-08-1948 wei wow mang kyrpang 10 tylli ki Seat neibynta ki khlieh synchaar kam ki Syiem, Lyngdoh, Sirdar, Wahadar wa Dolloi na ki Hima/Elaka wow man kam ki MDC ha KHADC wa JHADC neibynta ar snem.
Ka seiñ da ong ko wa kat wym pu pynkrehkaam ya ka soskular wa da soi ha ka Annexed Agreement (AA) yong ka Instrument of Accession (IOA), toh wow pyrkhat chwa manda pynkylla (Amendment) kawa 125 yong ka riti synchaar yong ka ri India kawa da tyrwa ha u snem 2019, dei wym toh u chah ya ki seiñ saiñ pyrthai wow yaleh Election na ki District Council ha Meghalaya kawa da sariem wa i pynbna hapoh ka Meghalaya Municipal (Amendment) Act 2000 wow khang ya ki Political Party wow yaleh Election Municipal na ki Ticket lane ka chap (Symbol) ki Party wa da tipmit da ka Election Commission of India.
Da e nongmuna leh wa ha u snem 2015-2018 hadooh wa da mih kawi ka Political Party napoh ka KHADC. Wei ki MDC da pynwit ki leh ha ki Election Dorbar Chnong wa kiwi kiwi iwa pynpoi cha ki yaleh mukotduma.
Kamtæ da ong wa ini i wym ye u pynbait yei krehkaam ya ka IOA waka AA yong u 17-08-1948 da wanrah ko ya ini i kulmar wei da man kam u moochynthut wow pynbait noh ya u pood wa ka Assam wa Bangladesh heiwa ym em u kynthup lang ya ki Khasi States hawa ya soi ya ka soskular Land Boundary Agreement (LBA) yow pynbait pynbood hapyrdi ka India wa Bangladesh.
Hajrong ini waroh ka seiñ da dawa ko wow thung 10 ngut ya ki Syiem, Lyngdoh, Sirdar, Wahadar & Dolloi ha ka KHADC wa JHADC kam ki Nominated Member neibynta ar snem yow e laad ya ki wow chimbynta ha ki aiñ wa yatoh waka dustur riti wei ym hap wow su tulop ya ki.
Da dawa leh wow pynduna noh ya ka samoi man MDC na ka 5 snem cha ka 4 snem.
