Heiyatoh wa ka takit wa da pynman da ka Ampati Women Police Station hajrong i wiar ki arngut ki khynnah kynthai nadooh u Thohlakhmi (Feb) 2021, neiliang u SP ka South West Garo Hills da pyntip u wa da yoh wow pynlait ya waroh arngut kawi na Rajasthan wa sa kawi won na Haryana.
Ha i takit da chem wa kawi na kini ki khynnah da chah rah ko cha Mahendragarh District, Haryana wei da dai ya ka neibynta wow pynbia kamjooh ya sa kawi da chah rah ko cha Jhunjhunu District, Rajasthan yow pynbia ya ka leh.
Ki pulit ka South West Garo Hills deiwa yoh yarap na ki pulit ka West Garo Hills da kem ki ya arngut ki kynthai kiwa na Tura wa kawi na Tikrikilla kiwa da emkti wow leh ya ini i kaam.
Hawa takit ya kini ki le ngut da phla ki wa rah ki ya kini ki khynnah na Tura cha Haryana deiwa yarap kiwi de. Wei da iwa khana kini ki le ngut da ye wow lai pynlait ya kini ki khynnah da ki pulit ka South West Garo Hills deiwa lai cha Rajasthan wa Haryana heiwa da ye leh wow ekti noh ya kini ki khynnah cha kiwa hayung hasem yong ki.
Sa kawi ka kynthai kawa na Tura tangwa kawa da chong da sah ha Haryana da kem ya ka kawa da emkti bha wow dai ya kini ki khynnah kynthai wei wow pynbia ki. Ki pulit da pyntip ki wa ka takit dang lai ko chakhmat wei daw kem chooh chooh ya kiwi de.
Neiliang u SP da ong u wa ini iwa jia da haap ko hapoh ka Human Trafficking Case namo i khayi tooh ya ki bru, kamtæ da kyntu ya ki paidbah wow pyntip smat ki lada em kiwon kiwon kiwa wiar khamtam ki khynnah wa ki kynthai neibhah yarap ko ya ki pulit wow booddien lada wan smat ki paidbah chakhmat.