Ka Joint Action Committee kawa kynthup ya ki ar tylli ki seiñ, ka East Jaiñtia Hills Truck Owners & Transporters Association waka East Jaiñtia Hills Limestone Suppliers Association, ynnin ka sngi da lai yachem ki ya u Deputy Commissioner yong ka East Jaiñtia Hills District wow dawa na oo wow chimkhia katkam ki kyndon aiñ hajrong i kit palat-pood wa pyrchah aiñ yong ki Truck waphær waphær kiwa lai luti lyngba yong u sarokbah NH-6, iwa da pynman ya utai u sarok wow sih chilynter luti ha ki thaaiñ East Jaiñtia Hills, khamtam ha ki thaaiñ Elaka Narpuh hawa utai u sarok da jæd da pra bha u phrai hadooh wa da wanrah ko yei eh i khoo iwa khroo hadooh kattæ kattæ ya ki paidbah wa lai wa wan khamtam ya kiwa kjut wa chitom kiwa emkaam u poi smat chei thaw sumaar.
Ka Joint Action Committee, hei yaklam wa u Deputy Commissioner yong ka East Jaiñtia Hills District da khana che bha ko ya oo wa katkam wa man kattæ la chityiaw tam wei hadooh katni da sih palat u NH-6 khamtam ha ki thaaiñ Narpuh iwa da yoosangot sakhiat hadooh kattæ kattæ, kat hadooh wa da sahkut ki kari da ki phaw phaw kynta ha ki thaaiñ Narpuh, khamtam ha ki thaaiñ Ratacherra wa Tongseng.
I daw waroh yong ini toh neidaw wa yoh mon ware ki Truck u kit palat-pood kiwa lai luti lyngba yong uni u sarok. Ini i kit palat-pood yong ki kari da booh haroh ko hei maa iwa khroo ya ka yingkieñ Narpuh-Sonapur waka Ri Pnar Samasi.
Kam wow pynkynmoo wa neibynta i bha i miat yong u paidbah wa lai luti lyngba u NH-6 uwa man u thied snaam wa kongsan yong ka thaaiñ khlieh-mihsngi yong ka ri India, ka Joint Action Committee yong kitai ki ar seiñ, ha ka 22 tarik u bnai wa dadep, da pynman ko yei kynreh naphang ya ki Truck wa kit palat-pood ha Kongong, Wapungshnong wa ha Tongseng, ha ryngkat i ya emlang yong ki bor sorkar wa toh sap u pait, kiwa kynthup nadooh ki Magistrate, ki pulit, ki sahep sorkar wa kiwi kiwi de. Ha katai ka kynreh kari, ka Joint Action Committee da ksoh wei pynuiñ ko ya chiboon bha ki kari wa kit palat-pood.
Hei khaddooh i yaklam wa u Deputy Commissioner yong ka East Jaiñtia Hills District neibynta i bha i miat yong u paidbah waroh uwa pynemkaam ya u NH-6, khamtam ya kiwa chong chnong yong ka East Jaiñtia Hills District, ka Joint Action Committee da dawa ko na ka sorkar wa na ka bor District kiwa toh sap u pait yeini wow pynkreh kam hok ya ka aiñ Motor Vehicle Act, 1988 wa ya ka Prevention of Damages to Public Properties Act, 1984, ha ryngkat i maham wa lada jia wym ye ka sorkar wow kdoh u khoom yeini i kit palat-pood yong ki kari, ka Joint Action Committee daw chim won ko da kawi tawon ka rai kawa khor heiyatoh wa ini.
Kani toh katkam ka kyrwoh khubor wa da pynlait da u President yong ka Joint Action Committee, u Loveyou Bareh wa u Secretary, u Deolangki Dkhar.
Discussion about this post