Jowai: Ka Jaiñtia National Council-Central Body, ynnin ka sngi hapoh i yahkhmat u President Rangbah yong ka u Wanshwa Suting hadien wa yoh ujor ko na ki paidbah ka East Jaiñtia Hills da lai booh dorkhat ko ha u Superintendent of Police, East Jaiñtia Hills District.
Ha kani ka dorkhat da dawa na ka office wow booh pulit pyllai kari ha waroh ki laad yong u sarok NH-44 wa lai cha ki skur waphær waphær hapoh Khliehriat yow chngaiñ i lai i wan ki khynnah.
“Kamwa man katni aw jan waroh ki laad ha uni u sarok wow lai cha ki skur waphær waphær ym em pulit wa pyllai kari heipor wa sdang namo kut skur man ka sngi iwa booh yei mynsien ki khynnah hei ma” da ong ka seiñ.
Ka seiñ da yachem ko ya u Superindent of Police, u N. Lamare heiwa da kyntu ya oo wow booh ya ki pulit wow pyllai kari ha kam kini ki laad neibhah wa em da ki hajar ki khynnah wa lai lyngba u NH-44.
Neiliang u S.P da pynsñiaw u yei eh wow leh yeini neibhah wa duna ware ki pulit hapoh ka district wei khamtam neidaw wym em ka Traffic Cell hapoh ka District.
Kamtæ ka seiñ da kyntu ko ya ka tnat sorkar wa toh u pait yeini neibynta i bha i miat ki paidbah khamtam ki khynnah skur.
Discussion about this post