Ka Jaiñtia National Council (JNC) CEC hapoh i yahkhmat u General Secretary, u Wanshwa Suting da lai yachem ko markhmat wa u Thombor Shiwat, CEM ka JHADC hajrong ka phang wow dawa pynman noh da ka dorbar wa kyrpang wow dawa pynpsiah ya ka ktien Pnar ha ka Meghalaya State Language Act, kamjooh wow chna da ka aiñ wa khlan wow pynneh pynsah yei ktien i thylliej wei ya ka riti ka dustur yong ka Ri Jaiñtia.
Ha i thoh wa da e cha u CEM da ong wa ka JNC kam kawi na ki seiñ krehmon sñiawbha napoh Ri Jaiñtia kawa da mih chakhmat wow dawa na ka sorkar jylla wa da toh u pynpsiah noh ya ka ktien Pnar hapoh ka Meghalaya State Language Act. Wei wa ka JHADC datoh leh u em ko da ka aiñ kawa kyrpang neibynta u pynneh pynsah ya ka riti ka dustur ka yong i khamtam ya ka rukom e jait ka yong i cha ka bei, wei ya ini i mat dawa ka JNC da jooh pynsñiaw ko leh ha kylleiñ ka Ri Jaiñtia lyngba ka “Save Jaiñtia Mission”.
Ka seiñ da ong ko wa kamwa ka JHADC da mynjur ko wow tipmit noh ya ki dak Jaiñtia, wei wa ya kani ka rai dadep leh wow pynbna hapoh ka laad pynmih khubor ka jylla (Gazette of Meghalaya) ha u snem 2021.
Ka JNC kwah ko leh u pynsñiaw wa emkaam ya ka JHADC wow sdang noh ko u pynemkam da ka ktien Jaiñtia ha ki thoh ki taar ki yong ka, khamtam hawa chna yaki aiñ, hawa pynmih ya ki pynbna (Notification) waphær waphær ki yong ka.
Ka JHADC toh u thooh ko ki laad ki luti kammon u leh yoh u ye u pynpsiah ya ki dak thoh Jaiñtia khamtam ha ki skur kiwa pait daka JHADC.
Ka JNC kwah ko leh u pynsñiaw wa emkaam ya ka JHADC u pynkrehkaam noh ko da ka rai (Resolution) hapoh ka dorbar yong ka JHADC, wa da toh emkaam ya ka sorkar jylla u tipmit noh ko ya ka “Ktien Pnar” kam kawi na ki ktien wa em yei thoh i tar (Official) hapoh ka jylla Meghalaya, deiwa pynpsiah ya ka “Ktien Pnar” hapoh ka Meghalaya State Language Act, neibhah hawa im i ktien im ka jaitbru.
Kawa pynphær ya i ki khon ka Ri Jaiñtia (Pnar, War, Khynriam & Bhoi) na kiwi tawon ki para jaitbru ri-loom kiwa chong wa sah hapoh u pood u ang yong ka Ri Jaiñtia yong i toh ka rukom e jait ka yong i cha ka Bei, da ong ka seiñ deiwa pynrap wa i kam ki khon u Ynñiaw Trep Ynñiaw Wasa nadooh kulong kumah, ki warim wajah ki yong i da sikai ki ya i wow e jait cha ka Bei weiwa ya ini i sikai yong ki dang ksoh i ki hadooh katni.
Ha kani ka pyrthai stat kawa katni da sdang em kiwa pyrchang u yahbakla ya ka jaitbru yong i deiwa kwah ki u pynkylla ya kani ka rukom e jait ka yong i cha ka bei, na itæ i daw ka JNC da mih ko chakhmat wow e yumut ya ka JHADC wa da toh u chna noh ko da ka aiñ kawa khlan neibynta u yada ya kani ka riti dustur yong i kawa da hiar pateiñ na ki warim wajah ki yong i.
“Kat dang ye i u yada ya kani ka riti dustur ka yong i, dang ye i leh u ong wa i man i ka jaitbru kawa kyrpang heini ha sla pyrthai, weiwa kini kiwi tawon ki jaitbru ri-loom kiwa em hapoh u pood u ang yong i leh wym ye ki u kamtre ya ka ri ka muluk ka yong i, neibhah ka riti dustur yong i wa ki yaphær ko,” da ong ka seiñ.
Neibynta ka mynried ka pateiñ yong ka Ri Jaiñtia, ka JNC dawa joor ko na ka JHADC wa toh u chimkhia ko ya kini ki ar tylli ki mat dawa yong ka seiñ.
Kamtæ ka JNC kyrpaad joor ko ya ka JHADC lyngba yong u CEM wa da toh u em noh da ka dorbar wa kyrpang wow yaklam heiyatoh wa ini i dawa yong ka seiñ.
Neiliang u CEM da ong u wa oo leh mynjur u yeini i bynta wei kular u leh wow lai booddien yeini i kaam ha kini ki sngi wow wan khnang wow myntoi ki khon ka Ri Jaiñtia hi waroh kawi, neibhah ya ki dak thoh Jaiñtia ka JHADC dadep ko u phah da slem cha ka sorkar wei ya kani dang neh ko hapoh ka Law Department wow bichaar bniah.
Discussion about this post