Ynne ka sngi, ka Jaiñtia National Council (JNC) CEC hapoh i yahkhmat u General Secretary, u Wanshwa Suting da lai e dorkhat ko cha u Member Secretary ka Meghalaya State Pollution Control Board, Shillong lyngba u Deputy Commissioner ka East Jaiñtia Hills wow dawa pynsangeh noh yei thmu wow pynman yaka Public Hearing ka M/S MeghaTop Cement Private Ltd. kawa em ha Wahiajer, Elaka Narpuh ka East Jaiñtia Hills.
Ka seiñ ha ka dorkhat da pynsñiaw ko yei khyrniat wow yoo yei pynbna ka MSPCB haka 17-09-2024 wa daw pynman ya ka Public Hearing yong ka MeghaTop ha Wahiajer, Elaka Narpuh haka 18-10-2024.
Kam wow pynkynmoo wa ha ka 17-08-2024, uwi na kiwa yasaaid aiñ u (L) kynjaimon Amse ha ka khubor wa pynmih u da ong u wa ka M/S MeghaTop katkam ka RTI wa yoh u ym pu yoh ko ya ka NOC na ka Dorbar yong ka Elaka Narpuh wow seiñ ya ka kharkhana yong ka hapoh Elaka.
Kawa yoo lyngngoh toh haka 3 tarik u Naiynñiaw 2023, ka JHADC da e bor (Clearance) ko yaka MeghaTop wow chna ko yaka karkhana wa ye u pynmih 3 Million Ton waka 50 MW Power Plant khlem da bood katkam i rukom wow e Clearance, wei da kam hi-eh ko wa da yoh ya ka NOC naka Elaka, ini leh toh katkam ka khubor na u (L) Kynjaimon Amse, uwa da ong u leh wa yaka NOC wada e da u Dolloi leh hei sakhiat ymtoh ka NOC wow seiñ karkhana, tangwa yow pyntikna hi-eh wa lada jia ka Dorbar ka Elaka pdiang ko tæ daw e ya ka NOC .
Ka seiñ da ong ko leh wa dang ini i sngi wa dep da yoo leh wa neiliang ka Elaka Narpuh dang ha ka 14-09-2024 pynbna ko wow khut ya ka Dorbar kawa kyrpang haka 23-09-2024 da u General Secretary ka Elaka, u S. Sumer, wei kawi naki mat yaklam leh toh hajrong ka NOC ka MeghaTop, wei kani hi mut che ko wym pu yoh NOC ka MeghaTop na ka Elaka, da ong u Wanshwa Suting.
Iwa phylla leh neiliang ka JHADC da e ko wut wut yaka Clearance yaka MeghaTop wow seiñ ko yaka karkhana yong ka khlem da burom wei khlem da ap leh yei rai ka Elaka, wei lada jia wa ka Elaka Narpuh ym e ko yaka NOC ha katæ ka dorbar kyrpang tæ yi wow jia? Ini i leh embor ware ka JHADC pynyoo ko wa em iyi re iyi cha kylla, neibhah i kaamram yong ka toh wow pait wow yada yei khyndaw u chyiap, ki loom ki wah wa iwa em lut hapoh ka Ri-loom Jaiñtia ymtoh wow chim yei bor wei wow e pathar wow e laad yaki bru na baar wow wan kamai spah na ka ri yong i khlem da pyrkhat chooh ya ka mynried ki khon ki kti yong ka Jaiñtia, da ong chooh u GS ka JNC-CEC.
Ka seiñ katkam iwa tip ko, da chem wa ka MeghaTop Cement Ltd ym pu em ko ya kiwo kiwon i kot i sla wa emkaam na ka Elaka wow seiñ karkhana, kamtæ ka seiñ da pyrchah joor ko wow pynman ya ka Public Hearing, wei da kyntu joor leh yaka MSPCB wow pyndam noh chiseindon ya ini i thmu wow pynsñiaw paidbah yong ka MeghaTop ha ka tarik wa da booh, wei wow burom leh yei sur yong ka Elaka wa u paidbah hi wa boon wa lang khnang wa i chaniah yaka MSPCB da ki paidbah u neh ko, pynkut u Wanshwa Suting.
Discussion about this post