Ka Jaiñtia National Council (JNC) ynnin ka sngi da lai yachem ko wa ka Director ka DERT (Directorate of Educational and Research Training), Meghalaya, ka R.S. Manners heiyatoh wa i duna kiwa sikai ha DIET Thadlaskein, i emkaam kiwa lai puræ, i pynman ya ka Meghalaya Teacher Eligibility Test Exams wa heiyatoh wa ka Scholarship kiwa lai puræ ha DIET.
Ka seiñ da ong ko wa ha District Institute of Education and Training (DIET) Thadlaskein, West Jaiñtia Hills District em ko du 14 ngut kiwa sikai hadien wa chah kyrriah ar ngut kiwa sikai wei hadooh kattæ ym pu em thung da kiwi wei ini da pynkhia kaam bha ko ya kiwa sikai wow pyndep yei kaamram ki.
Da ong leh wa ka paikhana ha kani ka thaw puræ man ko kawa da sih bha wei kawa ye u haap u oor lada joor la’ær.
Ka JNC da dawa ko leh wow pynman ya ka Meghalaya Teacher Eligibility Test (MTET) man-u-snem heithaw chisien ar snem neibhah ini da pynlynga ko ya kitu kiwa da pyndep ya ka D.El.Ed wa B.Ed wei u yang ar snem da pynsepai bha ko yei por neibhah em kiwa da heh rta manda hap yang ki.
Heiyatoh won wa ka Scholarship, ka seiñ da ong ko toh kawa emkaam bha wow e mynsien ya kiwa lai puræ wei daw wanrah ko yei bha i miat ha ka puræ puthi hapoh ka jylla.
Neiliang ka Director da pyntip ko wa ki kreh wa lait ha ka DIET Thadlaskein da lai chakhmat wow pyndap ki tangwa ym pu em u pynmih Advertisement wei da yooluti wow leh yeini ym slem de.
Heiyatoh wa ka MTET, da ong ko wa da pynkhreh wow pynman ka man-u-snem nadooh u 2025. Katwa ya ka Scholarship won da pyntip ko wa da pynlait ya ka poisa wei ka sorkar daw phah noh ko cha kiwa lai puræ.
Discussion about this post