Ka Jaiñtia Students’ Movement (JSM) Central Body da pdiang sñiawbha ko ya i rai yong ka sorkar Meghalaya wow khut ya ka Khasi Students’ Union (KSU) cha i yaklam, neidaw wa ngait ka seiñ wa waroh ki mat wa mih nei kajia ye wow pynbait deiwa poi cha i yaklam, wym toh deiwa pynyoo bor mar kylliang.
Ka JSM da dawa ko na ka sorkar wow pynlait noh smat smat khlem kiwon kiwon ki kyndon ya waroh ki heh ka KSU kiwa da chah kem, khnang wow ye ki u chimbynta ha i yaklam wa ka sorkar.
Chooh chooh ka JSM da kyntu ko leh ya ka sorkar wow sangeh noh waroh ki pyrchang wow kem ya kiwi tawon ki heh ka KSU.
“Lada ka sorkar kwah ko wow wanrah yei suk haka imlang sahlang ha ka ri synchaar paidbah deiwa jai-jai ha ka jylla, kani toh ka luti wa nyngkong wa emkaam tam u leh ko wei lada ki heh dang chah kset ki hapoh patok, kamon u man i yaklam wa jop?” da kylli ka JSM.
Chooh chooh da ong ko wa i kem ya ki heh khynroo kiwa yakhun neibynta i hok ki tre ri, ki paaid ka ri-loom ym wanrah i yei suk tangwa daw pynjoor chooh i yei eh wa i awri.
Ka JSM da ong ko wa yieñ ko ryngkat waka KSU hajrong ki mat wa da dawa ha ka yurim wa man ki ki mat wow wanrah yei myntoi ya ka imlang sahlang, ka ri waka jaitbru waroh kawi.
Discussion about this post