Ka JSU da thoh ko cha u Montri Rangbah ka jylla wa cha u Commisioner of District Council Affairs wa ka sorkar da toh u kyruiñ ko cha i eh i khoo wa yachem ki wakreh ka JHADC wow yarap wow pynlait noh ya ka tulop yong ki wakreh ka JHADC wa kynthup lang ya ki MDC kiwa da kynjoh hadooh kamwa 1,700 ngut kiwa da dooh tulop la kamwa 6 bnai tam kattu.
Ka JSU lyngba ka chithi wa da phah cha ka sorkar jylla, da kitbok ko leh wow ye ko u pyndap yei emkaam ki paidbah khamtam heipor wa em ka Lockdown kawa 21 sngi wow yakhun pyrchah ya ka khlam u COVID-19.
Ka seiñ da kwah ko wa neiliang u Conrad Sangma u chimkhia u hajrong ini i eh i khoo wa yachem ki wakreh ka JHADC wow leh noh ya iwon iwon iwa emkaam.
Heijooh i por da beiñ ko leh ya u CEM ka JHADC, u Thombor Shiwat yei kheiñstiñ wei iehbeiñ u ya ki wakreh ka Council khlem su ya ka tulop yong ki da ki bnai deiwa pynrap leh wa ka Council da khrong ko ya ka dan aw man ka sngi kam naka chnat Forest, Revenue wa kiwi kiwi tangwa kani ka poisa na ka wiar hi-eh ko.
Neiliang u Treiborlang R Suchen uwa man uwi na kiwa yahkhmat ka seiñ da ong u wa da yoh u yaklam wa u Secretary yong u Montri Rangbah ka jylla wei da khana u wa u Conrad K Sangma da chimkhia u ya kani ka kaam wow yarap u pynlait noh ya ka tulop ki wakreh ka JHADC wa kiwi tawon leh ki District Council yong ka jylla. Tangwa ym pu em yoh yutip iwa bniah nawon hadooh katwan bnai wa ka sorkar u ye ko u yarap pynlait ya ka tulop yong ki wakreh ka Council.
Discussion about this post