Ka JSU ynne da lai yachem ko wa u Secretary ka sorkar Meghalaya, u CV Diengdoh yow dawa wa ha kani ka kylla wa ar i yaklam pynbait pood waka jylla Assam wow pynuiñ noh ya ka Block-I cha ka Meghalaya.
Ka seiñ da ong ko wa da e ya ka Block-I cha ka Karbi Anglong da u Lat ka Assam ha u snem 1951 du wow pynsuk ya ka synchaar khadar tangwa kani ka thaw toh nadooh ki por yong rim kawa em hapoh ka Hima u Syiem Jaiñtia wei ini i leh uni u Lat toh hapyrdi i pyrchah yei mon ki paidbah hadooh wa da wiar leh wa ka Elaka Labang-Nongphyllut, da dooh leh ya ka Langsoh-Mynriang Sirdarship wa kiwa boon ki bynta ka Elaka Raliang wa tip kam ka Pangam Raliang.
Kamtæ da dawa wow pyndooh noh ya kani ka hukum wa da pynmih u Lat ka Assam ha u Naitung (Apr), 1951 neibhah kiwa boon hi kiwa chong chnong kani ka thaw da pynsñiaw ki wa kwah ki wow em hapoh ka jylla Meghalaya.
