Ka JSU-Southern Border Zone East-Jaiñtia Hills hei yahkhmat u Ajoymeson Lyngdoh, President wa u Barister Suchiang, Secretary haka 17 tarik uni u bnai da yachem ki wa u DC ka East Jaiñtia Hills District yow dawa pynyabi ya u sarok Shillong-Silchar High-Speed Corridor Road wa ki sarok chnong ka thaaiñ Bataw wa kynthup ka chnong Umsatai, Pynurkba, Bataw, Umlangsha, Lakadong, Lama, Borghat, Kwator wa Hingaria.
I daw wa dawa ka seiñ toh wa katkam ka Survey wa man kattæ, uni u sarok wa mut chna da yait jngai u na kini ki chnong, iwa daw wanrah yei saja ya ki paidbah wa chong chnong.
Ka seiñ da ong ko wa lada ym pynyabi ya u sarok High-Speed Corridor Road wa ki sarok chnong, da man kamwa chah leh mylliñ ki chnong nei wan uni u sarok, wei daw duna i yoh myntoi ki paidbah wa kynthup nadooh ki warep, kiwa khreh Business khian, neitæ daw saja ki hei pynkit mar, manda emkaam jhan wow lai cha thaw sumaar lada ym em ki luti wow poi cha uni u sarok thymme we ini daw ktah ko leh yei yoh i la ki paidbah.
Hajrong kini ki daw waroh, da pynsñiaw kyntu haroh ki ya u DC wow kyrpaad u cha ka NHAI wa PWD u lai li pait biang ki ya ki thaw ya u sarok yow pynpoi cha uni u High Speed Corridor wei neiliang kiwa chong chnong leh smat ki wow e yei thaw kamjooh i ya krehlang yow pynsuk yei kreh.
Discussion about this post