15 49.0138 8.38624 1 0 4000 1 https://wyrta.com 300 0
Advertisement ad1

Dawa ka KSU JHDU waka KC yow pynkrehkaam biang ya ka Khliehriat Town Committee

0 Comments

Jowai: Ka KSU Jaiñtia Hills District Unit deilang wa ka KSU Khliehriat Circle ha i emlang u Ohibait Dkhar President KSU Jaintia Hills District Unit wa u S S Niangti President KSU Khliehriat Circle wa u Morningstar Pasi dkhot yong ka KSU Jowai Circle ynni ka sngi da lai sylli ki ya ka yung krehkaam yong ka Khliehriat Town Committee kawa em ha Khliehriat West kawa haap hapoh ka East Jaiñtia Hills District.

Ka seiñ ha ini i lai sylli da chem ko wa ka yung krehkaam kawa paka da man noh ko ka thaw sah yong ki mrad, ki kari wa em artylli kiwa toh wow kit ya i jhep hapoh ka chnong da pynieñ khlem da pynemkaam hadooh wa ki da baam ka sarang ki kiwa ym ye de u pynemkaam wei da man thaw noh jhep ki paidbah.

Ka seiñ hadien wa da yoh laad ko wow yaklam wa ki kattu katni ngut ki bru waheh na kani ka thaaiñ, da chem wa waroh kiwa kreh kani ka yung krehkaam ym em de yoh tulop ki la kamwa chi snem tam na ka District Council wei hadooh ki sahep wa toh u pait ya kani ka Town Committee leh ym em de ki.

Ka seiñ da i mynsien wa sñiawkhia wa sñiawchrai wa ka sorkar ka khlem da pynemkaam ya kini ki mar neibynta ka khooid ka suba yong ka chnong waroh kawi, kamtæ ka seiñ da dawa ko naka Jaiñtia Hills Autonomous District Council deilang wa kiwi de ki bor wa toh u pait wa ki toh u chimkhia wow pynkrehkaam biang ya kani ka yung krehkaam wei wow su ya ka tulop kawa dang sah yong waroh ki wakreh næ hun ki wa ka Khliehriat kawa man ka Head Quarter yong ka East Jaiñtia Hills District u man ko ka chnong kawa jakhlia tam næ hun ki wa i jhep u noh roi cha luti cha ki surok da ong u SS Niangti President KSU Khliehriat Circle. 

U Ohibait Dkhar President yong ka KSU Jaintia Hills District da ong u wa ka Council deilang wa ka Municipal Board toh u chimkhia ki ya kani ka kaam wei wow pynsmat katwa ye wei lada ka sorkar hi ym ye ko leh iyi iyi hajrong ini, ka seiñ ym chong kli kti ko wei wow paitke khamtam heiyatoh wa ka khooid ka suba wei ka seiñ ha kini ki sngi ki wow wan daw lai yachem ki wa ki bor wa toh u pait ya ini i kaaam yow paan pynche wei wow pynkrehkaam chi syndon, wei lada ym ye ki wow chimkhia, ka seiñ ym banse ko wow pyrkhat wow lai da kiwi won ki luti.

0 Comments

Leave a Reply