Jowai: Ka Khasi Student’s Union Jaiñtia Hills District Unit (KSU-JHDU) haka 27 tarik uni u bnai hapoh i yahkhmat u President yong ka, u Ohibait Dkhar da lai yachem ko ya u Deputy Commissioner ka West Jaiñtia Hills District heiyatoh wa i roi ki kari baar jylla ki wym biang kot kam ki Special Permit, Trading License, Labour License wa kiwi kiwi ki kot kiwa emkaam wow wan khayi cha ka thaaiñ khamtam kiwa khayi moochuni wa kiwi ki moo cha Bangladesh lyngba u sarok NH-40E chadooh Land Custom Station Tamabil Dawki deiwa ong wa kini ki kari ki baar jylla da chah beh ki na Majai, East Khasi Hills, Dubri Assam wa na Dalu Garo Hills District, wei katni won wan knieh khih ki wa ki tre jylla.
Ka seiñ da ong ko wa da jooh pynsñiaw ko yeini cha ka sorkar jylla, ka District Council (Trading License) lyngba ki dorkhat wa kiwon kiwon ki kaam khayi kiwa dang ye ki tre jylla wow kreh wow elaad chwa ya ki tre jylla khamtam ha kini ki juk wa da em boon kiwa stat katwa i khih i kreh won duna i.
Neiliang ka seiñ da thoh ko leh cha u District Transport Officer West Jaiñtia District wow kylli hadooh katwon tylli ki Special Permit wa da e ya ki kari baar jylla wow ye ki u mylla heini hajrong wa duna khih duna kreh, tangwa neiliang ka tnat ym em ye ko wow jubab deiwa biang wei iwa phylla toh wa na kini ki daw sdang roi kini ki kari baar jylla.
Da dawa ko leh na ki bor District wa na ka District Transport Office wow chimkhia yeini deiwa beh ya kini ki kari baar jylla ki wym biang ki kot ki sla lym kamtæ ka seiñ daw thooh ko da kiwi ki luti.
U Ohibait da ong u wa i wan kini ki kari da ktah joor i yei khooid i ngiar ki chnong neibhah kini ki kari baar jylla da ki bnai sah ki ha chi lynter ki sarok khamtam ha NH-40E iwa da pynthut ya ki khynnah puræ.
Neiliang u Deputy Commissioner ka District, u R. Rapthap da kular u leh wow khut yalang u da kawa jhan ha ka 31 tarik uni u bnai hajrong kani ka kaam.
Discussion about this post