Shillong: Ki dkhot ka Khasi Student Union (KSU) ryngkat wa ki Rangbah Shnong ka thaaiñ Langpih ynne ka sngi da lai yachem ki ya u montri ka chnat pohyung ka jylla, u James K Sangma wow dawa wa ka sorkar toh u pyntikna ko wow wanrah yei chong chngaaiñ ya ki paidbah ka thaaiñ khappood khamtam ha Langpih hadien wa chah thombor ki ha ki pulit ka Assam.
U President ka KSU u Lambokstarwell Marngar da pyntip u wa ha ini i yachem, neiliang u montri da kular u wa ka sorkar daw lai ko chakhmat wow pynkrehkaam ya ka Project saam bordiñ cha katai ka thaaiñ wei da kular u leh wow yarap ya ki bru wa da mynsoo hei chah thombor ha ki pulit iwa da jia ha ka 14 tarik uni u bnai.
Heijooh i por u President ka KSU da ong u wa ka seiñ dawa ko wow booh ya ka Police Outpost kawa pura ha Langpih khnang wow yada ya ki paidbah ka thaaiñ.
Kam wow pynkynmoo heini 2 ngut da chah kem ki ha ka 14 tarik ha Umwali hadien wa ki pulit Assam da wan pynthut ki yei chna ya ka project saam bordiñ yeiwa da leh neiliang ka sorkar Meghalaya.
Ha iwi i liang u Lambok da maham u leh ya ki jaitbru Nepali wymtoh u pynthut ki ya ki Khasi ha kani ka thaaiñ wei lada pteiñ i daw yaklam noh ko wa ka All Assam Students Union (AASU) hajrong kani ka kaam.
Discussion about this post