Ka KSU Narpuh Circle da yachem ko wa u Montri ka chnat C&RD, u Hamlet Dohling yow dawa pynchna ya ka C&RD Block wa thymme ha Lumshnong, East Jaiñtia Hills hadien wa ini wadep ka sorkar da pynskem ko ya ka Wapung C&RD Block.
Ka seiñ da ong ko wa ka thaaiñ Narpuh toh kawa heh kawa em 55 tylli ki chnong wei da em bru palat 45,000 ngut kiwa boon toh kiwa im dei rep i riang wei dang duna iwa emkaam kam ki skur heiwa ki bru wa tip u thoh u tar dang duna bha ki.
Da ong leh wa ki kreh MGNREGA, ka PMAY Scheme wa ki yarap ya ki SHG ym ye wow pyndep heipor neidaw wa hap lai luti jngai yow poi cha ka yung krehkaam ka Block ktamtam kiwa sah ha Hingaria wa jngai 80 Km na Wapung katwa kiwa sah ha Malidor da jngai 101 Km. Tangwa lada em yung krehkaam ka Block ha Lumshnong kini ki chnong daw jngai ki du 50 Km donhi.
Chooh chooh da ong wa lada kheiñ du ka bai kari wow lai chadooh Wapung dapoi ko T. 750.
Da kdaw leh wa ka chnong Lumshnong da bait ko wow e yei thaw wow booh ya ka C&RD Block wa thymme wei ini daw ye sakhiat wow wanrah yei roi i paar wei wow pyndooh yei dooh i duk hapoh ka thaaiñ Narpuh lada e ka sorkar ya ka C&RD Block wa thymme.
