Dawa ka KSU wow pyndooh yei pyrtuid ka dkhar wa yoh u lai puræ MBBS na ka State Quota

Ka KSU hadien wa yoo yei pynbna ka sorkar Meghalaya lyngba ka chnat Health & Family Welfare yei pyrtuid kiwa chah jied wow lai puræ MBBS da ka State Quota yow lai puræ Doctor cha baar jylla, da chem yei pyrtuid ka Diya Ghosh kawa yoh NEET Score 472 wa ka Tanushka Chakravarty kawa yoh NEET Score 442 wa da chah jied ki hapoh ka Unreserved Category.

Ka seiñ da pynkynmoo ko wa ka Unreserved Category ym em mut ko kyrpang du ya ki dkhar tangwa ya waroh ki nong Meghalaya wa kynthup ya ki Khasi, Jaintia wa Garo wei i mih pyrtuid hapoh ka Unreserved Category man bait ko katkam i lehbha namo ka Merit ymtoh deiwa kheiñ ya ka jaitbru. 

Wei lada pait katkam wa da pynbna ka sorkar da em i leh chiliang ya kitu ki jaitbru ka jylla wow lai puræ MBBS neibhah da em kiwa yoh ya ka NEET Score wa heh ya ki ar ngut ki dkhar iwa mut wa dang em hok kiwi wow psiah hapoh ka Unreserved Category.

Da kdaw leh wa em kiwa heh ka Score bar ya ka Diya Ghosh wei da em hadooh 6 ngut ki Khasi-Jaintia kiwa heh Score bar ya ka Tanushka Chakravarty iwa mut wa kiwa yoh nyngkong ha ka Khasi-Jaintia Category toh u em ki ha ka Serial Number 13 yong ka Unreserved Category katwa ka Diya Ghosh toh u em ko ha ka Serial Number 14 iwa mut wa da toh u em uwi/kawi kawa na Khasi-Jaintia Category wow psiah ha ka Unreserved Category iwa daw pynlait leh ya kiwa em ha ka Waiting List yong ka Khasi-Jaintia Category wow chah jied ki wow lai puræ MBBS. Tangwa ka sorkar Meghalaya da tyngkheiñ ko yeini deiwa pynpsiah pyrtuid pyrchah ya ka aiñ ya ka Tanushka kawa da pyndooh laad wei pyndooh hok yei hok yong ki Khasi-Jaintia.

Related posts

Pynman ka Ladmukhla yei pynkhooid chnong

October 2, 2025

E khublei u President ka Congress ya u PM Modi

October 2, 2025

Kamtæ ka KSU da ong ko wym ye u pdiang yeini i leh chiliang ka sorkar wei da dawa wow pyndooh yei pyrtuid ka Tanushka wei wow thap noh dei pyrtuid ki Khasi-Jaintia kiwa toh hok wow yoh. Neibhah ini ymtoh i sien wa nyngkong wa sorkar da leh embor ko yei hok ki Khasi-Jaintia iwa da jia ha u snem 2020 ha ka chnat Agriculture leh heiwa ka KSU da hap ko wow tuklar u pynyoh yei hok ki Khasi-Jaintia.

Wei lada ka sorkar ym pyndam ko yei pyrtuid ka Tanushka, ka KSU daw hap mih madan ko wow pynbor ya ka sorkar wow pynyoh yei hok ki Khasi-Jaintia.

I pyntip na u Donald V Thabah, General Secretary ka Khasi Students’ Union, Central Executive Council.