Ka Khasi Students’ Union Shnongpdeng Unit da pyntip ko cha ka chnat PWD kawa toh u pait ya u sarok Darrang-Shnongpdeng neibhah wa hadooh kattæ ym em iwon iwon i pynkhreh wow chna næ siang rong noh hadien wa da wan booh ya ka Signboard PMGSY harood sarok.
Ka seiñ da ong ko wa u sarok hadooh kattæ katwa dang mih ki sngi nang joor i sih u wei ki kari leh da chem chitom ki neibhah wa ym em wa pait. Wei hei yong sakhiat uwa kreh ya kani ka sarok da toh u pynpoi noh u ya ki tiar ki tar wow sdang noh ya i kreh tangwa hadooh kattæ ym em yoo ya kiyi kiyi ki dak ki chin wow sdang kreh.
Ka seiñ da pyntip ko leh wa ha i yaklam wa u Executive Engineer ka PWD Jowai (South) da ong u wa da toh wow pynkreh noh smat ya uni u sarok khamtam ha kini ki por wa dang duna ki kari Tourist wa lai cha kani ka thaaiñ yow rap suk i rukom kreh.
Kamtæ ka seiñ da dawa joor wa toh u kreh noh wut wut ya uni u sarok khnang wa ki paidbah cha kani ka thaaiñ u suk ki khamtam kitu kiwa kjut wa chitom yow ye ki u poi smat cha ki thaw sumaar.
Ka seiñ lyngba ini da phah ko leh ya u Contractor wa yoh wow kreh ya uni u sarok wow toh u wan kreh noh khnang wa i kaam i jaam u lai bait lai ryntih.
