Shillong: Kiwa sikai kiwa yaleh ya ka Exam wa tip kam ka Meghalaya Teachers Eligibility Test (MTET), hapoh ka lama ka Meghalaya Elementary Pre-service Trained Teachers Association (MEPTTA) da dawa ki na ka sorkar wow pynman biang ya ka Exam kaam sikai hadien wa ki lait tooh ki Question Paper chwa i por Exam.
Hawa yaklam wa ki laad pathai khubor ynnin ka sngi, u President ka MEPTTA, u Kiewshaphrang JW Thabah, da ong u wa ka seiñ da dawa ko na ka sorkar wa toh u pynman biang ya kani ka Exam deiwa khut thymme wei ha i jooh i por da beiñ u ya i lait tooh ki Question Paper deiwa pynbaad wa ini pynyoo wa tkoh i rukom krehkaam ka sorkar jylla.
“Ini ymtoh ka sien wa nyngkong wa lait tooh ki Question Paper, ini toh i tkoh ka chnat puræ puthi,” da ong u.
Da ong u leh hanlada i lait tooh ki Question Paper da jia i du ha kawi ka thaw thoh Exam ha Tura Government College, tangwa ki Question Paper wa lait tooh ye ki wow poi cha kiwi kiwi lyngba ka Internet ha kani ka juk kawa katni.
“I ymye i u pynsakhiat wa i lait tooh ki Question Paper da jia u du ha kawi ka Center, i dawa i wow pynman bait da kawi ka Exam wow pynyakhun biang ya kani ka Exam ha waroh ar tylli ki Paper, Paper-I yong ki LP wa Paper-II yong ki UP,” da ong u President ka MEPTTA.
Da pynbaad chooh chooh u wa i pynman ya ka Exam ym em man ko katkam ki kyndon ha ki Admit Card, wa da khang wow rah ya ki Mobile Phone ha ki kamra wa thoh Exam wa kiwi ki wa da khang.
“I chem i wa em boon kam kini ki jait kiwa tyngkheiñ ya ki kyndon wa da booh hawa yaleh Exam, kiwa yang Exam leh ymyoh ki ya i batai wa biang wei ki da leh ki da i mon yong ki,” ong u Thabah.
Da dawa u wa ka sorkar toh wow “Scan” chwa ya kiwa yaleh ya ka Exam chwa wow psiah cha ka kamra thoh Exam wei wow booh leh ya ki CCTV hapoh kamra næ kiwa riñ dur khnang wow lait næ khang laad ya i thmu leh tooh yong kiwa yaleh Exam.
Discussion about this post