15 49.0138 8.38624 1 0 4000 1 https://wyrta.com 300 0

Dawa ka MUPSTA na ka sorkar wow pyndam ya waroh ki skur kiwa em du i pyrtuid hapoh jylla

0 Comments

Shillong: Ka Meghalaya Upper Primary School Teachers Association (MUPSTA) da rai ko wow dawa na ka Sorkar jylla wow pyndooh noh ya ki skur wa em du i pyrtuid namo kiwa tip leh kam ki Ghost School kiwa da mih kam ki tit wei kiwa da man kam ki lymbdnang wa riñ spah ha ka jylla Meghalaya.

U President ka MUPSTA, u Kenneth Shadap da kubur u yeini i em kini ki skur ke ha ka jylla kiwa da ktah ya i myntoi wa kiwa sikai toh hok ki wow yoh.

Da ong u wa kiwa sikai man ki kiwa smat wow krehlang wa ka sorkar jylla neibynta wow pait yei em ki kini ki jait skur kiwa man du ki thaw kamai poisa yongyi yongyi.

“I mih kini ki skur toh du neidaw wa em ki bru kiwa kwah wow seiñ skur kiwa em i yajan wa kiwa mihkhmat. Kini ki skur toh kiwa em du kamwa ar næ le ngut ki khynnah katwa kiwa sikai won em ki hadooh 4 næ 5 ngut,” da ong u Shadap.

Da ong u wa napyrdi ki 1875 tylli ki skur wa kynthup nadooh ki Lower Primary, Upper Primary, Secondary wa Higher Secondary, kamwa 10 percent ye ki wow man ki skur ke.

“Kwah i wa ka Sorkar u pyndooh pyndam noh ko ya kini ki skur ki wym myntoi yeiyi yeiyi leh, katwa ki skur kiwa hok wow yoh kyrchaan yoh yarap ymyoh won ki na ka Sorkar,” da pynbaad u Shadap.

Dang ha u Khonchonglad 2018, u Montri ka chnat puræ puthi ka Sorkar jylla, u Lahkmen Rymbui da pyntip u wa ka chnat da phah takit ko yei mih ki skur ke wei wow pynchitom ya ki katkam ki kyndon ka aiñ.

Da ong u leh wa ini i pynchitom daw kynthup i wot ya kiwa sikai kamjooh ya ki Co-ordinator yong ki skur SSA kiwa leh stiñ yei kaam neibhah du neidaw i rukom krehkaam yong ki, ka poisa sorkar da man hi-eh ko kawa sepai wei i doohnong man i i yong ki paidbah.

U Montri da ong u leh wa ka sorkar jylla jooh mang poisa ko ym duna ya ka T. 3 hajar klur ha ka chi snem kawa kynthup nadooh i su tulop ya kiwa sikai, kiwa kreh wa kiwi kiwi.

0 Comments

Leave a Reply