Ka yakhih wow dawa pyndam ya ka Citizenship Amendment Act (CAA), 2019 ha ka jylla Meghalaya wa ha ka thaaiñ mihsngi ka ri da dang sawa biang wot hadien wa ka sorkar da dep ko wow klam che wa ki thaw wa haap hapoh ki Scheduled Area næ kiwa haap hapoh i pait ki District Council ym chah kynthup ha ka CAA.
Hawa kylli hajrong ini i klam yong ka sorkar wow pynlait ya ka CAA na ki Scheduled Area, neiliang u President ka Khasi Student’s Union (KSU), u Lambokstarwell Marngar da pynsñiaw u yei sñiaw kulmar ya ini i ong ka sorkar neibhah ym ye u pdiang wa ki Hindu u lai chong du ha kitæ ki thaw wym haap hapoh i pait ka District Council.
Da ong u wa hawa da man kam uwa chong chnong yong ka jylla ym ye wow ong wa toh u sah ha Khyndailad ym toh u wan cha Jaiaw, neibhah ym toh u khang yeitæ, wei pynrap u wa i klam yong ka sorkar wow pynlait ya ka CAA ym em yumut i, wei kam ka seiñ u dawa bait ko wow pynlait ya ka CAA ha waroh kawi ka thaaiñ mihsngi waroh kawi.
U Lambok da ong u wa lada pynlait ya ka Meghalaya, tangwa ki bru ym tip ki wa lada toh kiwa chong chnong wa pura yong ka Assam neibhah wa em ki da ki phaw lak, wei lada wan ki cha i, daw man ko i maa ya ki tre chnong ka jylla wa ka Northeast waroh kawi.
U Chairman ka North East Student’s Organisation (NESO), u Samuel Jyrwa da ong u wow pynlait yei krehkaam ka CAA na ki Scheduled Area wa ki jylla wa em ILP toh du i buit yong ka sorkar India wow pharia ya ki jylla ka thaaiñ Northeast, tangwa ini i buit yong ka sorkar ym ye ko wow tympiah ya ki jaitbru kani ka thaaiñ, neibhah da iwi i sur ki paidbah yieñ ki wow pyrchah wei wow dawa pyndam ya ka CAA.
Hawa yatoh wa i kam yong ka sorkar Meghalaya wa da pynlait ya ki thaw wa haap hapoh ka Sixth Schedule nei pynkrehkam ya ka CAA, uwa yahkhmat ka NESO da ong u wa ka Assam kawa man ka jylla wa heh dooh ha Northeast ym em lait ko na ka CAA, iwa mut wa ki bru wa poi wiar ha katai ka jylla daw yoh ki wow man kam ki nong India, wei iyi eh ya ki wow wan cha ka jylla Meghalaya ka wym em iwon iwon i yada nei wan ki bru wa na baar.
