August 17, 2022
Advertisement
U Montri Rangbah ka jylla, u Conrad K Sangma ynne da booh mooyurim u ya u sarok Umsning-Jagi Road ha ka yalang wa man ha Mawhati.
Hawa e yei klam, u Conrad da ong u wa uni u sarok toh uwa emkaam bha ya ki paidbah ka Mawhati neibhah wa ka sien wa khaddooh wa da chna ya uni u sarok toh heipor u PA Sangma iwa dapoi 40 snem.
Advertisement
Advertisement
Da ong u leh wa uni u sarok toh uwa emkaam bha ya ki paidbah ka jylla neibhah daw ye wow lai cha Jagi Road neitæ won cha Upper Assam wei daw ye u wow pynyajan ya ki paidbah ki ar jylla.
Da pyntip u leh wa u sarok Bhoirymbong-Mawlasnai-Sabuda Road wa 10 Km wa kynjoh T. 18.5 klur daw chna noh ya oo deiwa pynrap wa boon ki sarok PMGSY wa ki Block Office wa ki yung skur daw chna noh ha ka thaaiñ.
U sarok Umsning-Jagi Road nadooh na 51 Km u NH06 na Umsning u kut u ha khappood Assam-Meghalaya wei u jrong u kamwa 80 Km. I kreh ya uni u sarok toh hapoh ka Meghalaya Integrated Transport Project (MITP) deiwa yoh yarap na ka World Bank wei jrong u kamwa 40.13 Km hapoh Ri-Bhoi.
Uni u sarok sdang u na u NH06/Asian Highway wei kut u ha Km 40.13 yong ka SH-08 hajan Sonidan heiwa daw em 17 tylli ki chnong wow yabi wa oo kiwa kynthup ya ka Umsohlang, Nongjri, Nongkya, Sohpdok, Tdohumsiang, Raitong, Tdohumshiaw, Laiphew Diengngan, Mawdiengngan, Umlatar, Umwiehsnieh, Shilliang Umdoh, Mawhati, Pdeng, Jatah, Umsohlait, Sonidan wa 25 tylli ki chnong kam ka Umranong, Thad, Tiehwieh, Khliehumtrew, Mawkynrong, Umshiaw, Kseh Kynjoin, Umlaiteng, Kdohhati, Prangdngiem, Umjapung, Lummihwar, Laitsyiar, Sohphoh, Moorathud, Ingsaw, Pamlaban, Pamrinai, Iamkhon, Pdengnongrim, Pamphlang, Jair, Lamalong, Mawtari wa Syntumaw.
Chooh chooh uni u sarok daw pynsuk u ya i kit i bah ya ki mar wa har rukom heiwa ki kreh kynthup ki ya i chna pynheh ya oo cha ka 5.5 Meter.
Ya i kreh ha u sarok Umsning-Jagi Road u kreh ha i lut wa T. 83,38,49,016 wei daw pyndep ya i kreh hapoh 36 bnai.
Ha kani ka sngi da emlang u Montri ka sorkar jylla, u Dasakhiatbha Lamare, u MLA ka Umsning u Jason Mawlong, u MLA ka Jirang u Sosthenes Sohtun, u MLA ka Jowai u Wailadmiki Shylla wa kiwi kiwi.
