Ka Pnar Student Movement (PSM) Central Body ynne ka sngi da lai booh ko dei thoh ha ka sien kawa ar ha u Deputy Commissioner ka West Jaiñtia Hills District heiyatoh wa i hap su bai luti ha ka Toll Plaza wa em ha Ialong ya ki kari ML04.
Neidaw wym yoh u yachem wa u Deputy Commissioner, ka seiñ da booh ko yei thoh ha ka ADC, ka B. Blah wei neiliang ka seiñ da ong wa i hap su bai luti ha kani ka Toll Plaza ym yatoh ko kamwa man ha kiwi ki District, neibhah ha kiwi ki District da pynlait ki ya ki kari Local khlem da hap su hawa lai na ka Toll Plaza wa em ha ka thaaiñ yong ki, lait noh kani kawa em ha Ialong wa kawa em ha Mawkhanu.
Ka seiñ da pynkynmoo ko wa ha ka Toll Plaza wa em ha Mawkhanu, East Khasi Hills, uwi u bru uwa man kam uwa chong chnong katai ka thaaiñ da dooh u yei mynsien du neidaw wa ya kajia neidaw wa hap u su ya ka bai Toll Plaza.
Kamtæ neiliang ka seiñ PSM ym kwah ko wow jia ha Ialong kamwa jia ha Mawkhanu, wei hajrong ini da kyrpaad ya u DC wow chimkhia u heiyatoh wa kani ka kaam khnang yow pynsuk i yei lai i wan khamtam ya kiwa kjut wa chitom.
Ka seiñ da kyntu kynpham ko leh ya ki kari wa kamai kajih wow ya ksohktilang ki heiyatoh wa ini i kaam.
Ka seiñ da ong ko leh wa daw lai booddien ko leh sa ya ka Toll Plaza kawa dang pynkhreh u chim bai luti kawa em ha Lumshnong, East Jaiñtia Hills, ka wym em u jngai na kani kawa em ha West Jaiñtia Hills katkam ka Fee Rules yong ka National Highway.
Discussion about this post