Ka Pnar Student Movement (PSM) Central Body hei yahkhmat u President, u E. Passah wa u General Secretary, u W. Wann, ynne ka sngi da lai booh ki dei thoh ha u Deputy Commissioner wa ha u Superintendent of Police ka West Jaiñtia Hills District yow dawa booh noh ya ka Infiltration Check Gate yow pait u sylli yei wan psiah pyrchah aiñ ki dkhar na ka ri Bangladesh chapoh ka West Jaintia Hills District lyngba ki thaaiñ khappood khamtam na u surok Jowai-Dawki ha ki bynta wa dang haap ha ka Amlarem Civil Sub-Division.
Ka seiñ da yoh ko u yachem wa u DC, u Abhinav Kumar Singh heiwa da pynsñiaw yei eh neini i wan psiah pyrchah ki Bangladeshi wei da kular u wow chimkhia yeini iwa da booh hei maa ya ka ri wa ka thaaiñ yong i.
Kamjooh leh ka seiñ da lai yachem ko wa u SP tangwa neidaw wym em u da yoh u yachem wa u Additional SP, u Jason Myrom uwa da pyntip wa neiliang yong ki da phah ki cha ka sorkar yei dawa wow booh noh ya ka Infiltration Check Gate ha ki thaaiñ ka Amlarem Civil Sub-Division tangwa hadooh katni neiliang ka sorkar ym pu em booh ko ya knai ka Check Gate.
Katwa kamtæ ka seiñ da booh ko i kyrpaad wa hakhmat tam na ka sorkar wow chimkhia yeini i kaam neibhah ini waroh daw booh ko hei maa yei lai i wan, i chongsuk chongsaaiñ hapoh ka District, ka jylla wa hapoh ka ri waroh kawi.
Ka seiñ da ong ko wa daw booddien chooh chooh ko yeini chadooh cha dwar ka Secretariat ha kini ki sngi wow wan.
Discussion about this post