Ka seiñ JSM-Eastern Region da thoh ko cha u montri ka chait ka khiah ka jylla lyngba u DC ka East Jaiñtia Hills District wow dawa khang ya waroh 16 tylli ki karkhana Cement Plant wa ki Coke Plant wa em hapoh ka District.
Ka seiñ da ong ko wa ka sorkar da dep phah khang ko ya waroh ki thaw puræ, ki thaw uiñke suwari, ki Fete wa kiwi kiwi hadooh ka 31 tarik uni u bnai kam chibynta wow khang yei poor u khñiang COVID-19 tangwa ha ki karkhana won dang pteiñ hi i wan ki wakreh na baar jylla wei ym em wa pait yei lai i wan yong ki.
Kamtæ ka seiñ da sñiaw ko wa emkaam wow pynmih hukum wow khang ya ki karkhana pynmih khyndaw-bilat wei wow sylli yei chait i khiah yong ki wakreh hapoh i pait ki bor District wei wow pynchong kset ya kiwa chitom kamjooh leh yaka thaw waroh kawi.
Da dawa wow khang nadooh ka 20 tarik uni u bnai hadooh ka 31 tarik uni u bnai wei wow pteiñ hadooh ka 15 tarik u bnai wow wan lada emkaam, wei ym toh wow khate tulop ya ki wakreh ha kini ki sngi.
Ka JSM da ong ko leh wa lada ym leh ya ini, ym yohsa ko wow khang hi pyn daka hi ya kini ki karkhana.
Discussion about this post