Hajrong i ieh khonswet ka sorkar jylla ya u sarok wa pynyabi ya ki 4 tylli ki chnong kiwa kynthup ya ka Pala, Khahnar, Kseh wa Muknoor kiwa haap hapoh ka Elaka Sumer, East Jaiñtia Hills District neiliang yong ka EJNC-Sumer Circle da pynman ko da ka ‘Panel Discussion’ ha kani ka 4 tarik ha Community Hall, Samasi neibynta wow ya phyllu yumut hajrong i mutlop ka sorkar wow ap yei angnood ki paidbah katai ka thaaiñ itæ wow pynchna wei wow siang rong noh ya utai u sarok neidaw wa u sarok man u u thiedsnam yong ka imlang sahlang ha kiwa boon ki bynta.
Ha katai ka sngi da chimbynta da ki waheh chnong waphær waphær, kiwa yahkhmat yong ka Elaka Sumer, kiwa yahkhmat niam wa kiwa yahkhmat yong ka EJNC-CEC.
Waroh kiwa chimbynta da pynsñiaw ki yei sñiawsih wa khroo hajrong i wym ye u MLA wa MDC katai ka thaaiñ wow ya chimbynta lang ha katai ka ‘Panel Discussion’ wa da pynlai daka EJNC-SC.
Hadien wa da yaklam sani bha hajrong itai i eh yong ki paidbah, da iwi i sur da chim ya ka rai wow e da ka Joint Memorandum cha u MLA ka thaaiñ wei wow kyntu leh ya oo wow yaklam hajrong i eh ki paidbah katai ka thaaiñ hapoh ka dorbar ka Meghalaya Legislative Assembly kawa daw sdang nadooh ka 10 tarik uni u bnai.