Jowai : Hadien wa mih i kulmar hei yatoh wa i pynmih result ka District Selection Committee (DSC) West Jaintia Hills District (DSC, WJH) ar sien neibynta ka kyrdan Soil & Water Conservation Demonstrator (Jr-1), ki ar tylli ki seiñbhalang kiwa kynthup ya ka JSU wa ka JYF da pynap ki yei sñiawphylla ki yeini.
Kani ka list wa da pynmih ka DSC hadooh artylli em ki ka chithi No. DSC-3/Exam/Pt/2016-17/49 date Jowai the 31st August 2016 wa sa kawi kawa em u No. DSC-3/Exam/Pt/2016-17/50 date Jowai the 5th Sept 2016 kawa da soi da u Deputy Commissioner ka West Jaiñtia Hills uwa man leh u Chairman ka DSC.
Haka chithi (List) wa-ar da thoh wa toh kawa da pynbait ya ka list wa nyngkong (Corrigendum) wei ini da booh ko ya ki ar seiñ hei langoh kiwa da kylli wa neiyi i daw wa jia kamni hapoh ka DSC West Jaiñtia Hills heijooh i por da kylli leh wa neiyi i daw chimpor ko hadooh san sngi wow pynbait yeini iwa bakla.
“Ini ymtoh iwa bakla neibhah ha ka list wa nyngkong em 12 ngut katwa hadooh ynru ngut da wiar pyrtuid ki na ka list kawa ar (corrigendum) wei ha ka list wa ar da mih won hadooh 13 ngut, wei ini kdaw ko wa em iyi næ iyi cha lyndet” da ong ki Presidenr kini ki ar seiñ.
Ki ar seiñ da pynkynmoo ki wa u DC u Arunkumar Kembhavi da pyrchang u wow pynman ya ki exam wow man ki kiwa khooid wei kiwa lai bait heiwa da knieh u ya ki mobile phone ki khynnah wei da beh da black list ya ki kattu katni ngut. “Sakhiat emhok mo u pynbad du ya ki khynnah wa thooh khih lada jia kamni?” da kylli ki ar seiñ.
Neiliang kini ki ar seiñ da dawa ki wa toh u thung da ka dhab wow takit yeini khnang wow yoh yeiwa sakhiat wei kini ki ar seiñ daw booddien ki yeini.
Discussion about this post