Neidaw wa ood wa naam ki paidbah wa em i duna ha ki thaw sumaar sorkar kiwa em hapoh ka thaaiñ War Jaiñtia, ki ar seiñ kitæ ka Khasi Students Union wa ka Federation of Khasi Jaintia & Garo People napoh ka thaaiñ War Jaiñtia ha ka 29 traik u bnai wa dep da yachem ki wa u Director ka chnat ka chait i khiah ha kamra krehkaam yong oo ha Shillong neibynta wow yaklam hajrong i duna ki laad yarap ha ki thaw sumaar kiwa em hapoh kani ka thaaiñ.
Kini ki ar seiñ da ong ki wa da emkaam sa uwi u Doctor ha ka Jarain PHC wa ha Pdengshakap PHC wa ha Nongtalang, emkaam leh ya ka Ambulance hapoh ka thaaiñ, i wym krehkaam i thaw pynkha khonbo hapoh ka Jairain PHC wa i emkaam wow pynchna noh ya ka yung sumaar ka Pdengshakap PHC.
Ka yaklam da man ko kawa mihsoh heiwa neiliang yong u sahep da kular u wow leh smat yeiwa emkaam.
Heiyatoh won wa i dawa ka Joint Action Committee wa emlang ki ar seiñ wow pynku kyrdan ya ka Padu State Dispensary, neiliang u Director da pyntip u wa i kaam dang lai i chakhmat wei da phah leh ya ki seiñ wow yachem wa u DMHO ka West Jaiñtia Hills yow pyntip wei wow phah noh ya ki Repot neibynta ini i kaam. Neiliang kini ki ar seiñ da pynsñiaw ki yei sñiawkmen hajrong i chimkhia uni u sahep wei da kyrmen wa i kaam u smat i wow mankaam ha kini ki kajiak sngi neibynta ki paaid ka thaaiñ War Jaiñtia ha waroh kawi.