Shillong: Hadien wa ka chnat Agriculture da pynpsiah namo e Admission lai puræ ko ya ki bru kiwa na kiwi won ki jaitbru lyngba ka thup mang kyrpang (Reservation) yong ka jylla ha ka B.Sc (Hon) Agriculture ha ka College of Agriculture, Imphal. Ynne ka sngi ki soo tylli ki seiñbhalang wa kyntup ya ka KSU, FKJGP, HNYF wa ka RBYF da lai yachem ki ya u montri wa pait yaka chnat i rep i riang, u Banteidor Lyngdoh yow paan pynche hajrong i e bhah puræ B.Sc (Agri) ha Imphal kawa man pyrchah ya i bhah kyrpang yong ka jylla.
U President ka KSU, u Lambokstarwell Marngar da ong u wa i pynmih ya i pyrtuid lyngba ka chnat Agriculture da pynlyngngoh ko chiboon hawa yaklam hajrong ka bhah kyrpang, deiwa pynbaad wa ini ym toh de i bhah kyrpang tangwa da man ko ka bhahlang.
Da ong u wa kamwa man kattæ, ka seiñ ym hun ko ya ini i rukom e bhah, wei ini ym toh de i bakla tangwa i leh khnang.
Da pyntip u wa neiliang u montri sorkar da kular u wow pynbait biang ya ini i kaam khnang wa i yoh bhah kiwa lai puræ ym man ko kawa noh chiliang, deiwa pynrap leh wa lada noh chiliang, ym toh de ka bhah kyrpang tangwa man ko ka bhahlang wei ini daw chim noh ko yei thong ka bhah kyrpang næ ka Reservation Policy.
Hawa yatoh wa i pynbait yong ka chnat rep, neiliang yong u Lambokstarwell Marngar da ong u wa ym pdiang ya ini, neibhah toh du i tlep ait-miaw ya i leh khnang, deiwa dawa wa ka chnat rep i riang toh u chong biang wow jied ya ki ha i rukom kawa toh wow yoh yei lai puræ.
U Willbert Rani uwa man u President ka FKJGP, da ong u wa ha ka List kawa da pynmih man ko 14 ngut wei kamwa da yoo wa ki 3 ngut ki wym toh na ka jaitbru kiwa psiah lang ha i bhah wei ini i kheiñ man ko iwa bakla neibhah na kiwa puræ ki Garo da yoh 7, ki Khasi da yoh 4 wa kiwi da yoh ki 3 wei ini man ko i leh yabor wa pynyoo wa kitai ki le ngut da psiah ki ha i bhah ki Khasi.
Da ong u wa lada kheiñ wow psiah ha ka bhah yong waroh lane ka “Open Category” waroh ye ki wow psiah la toh u ST, SC lane OBC, tangwa heini ym ye wow pdiang hawa u Khasi uwa da heh ki Marks u lai psiah u ha i bhah kyrpang wot la ki Mark man ki kiwa rap heh bar ya utai u bru wa na baar wei ini i leh man ko wow pynyoh thaw ya kitai ki ar ngut ki wym toh ki tre jylla.
U Rani da ong chooh chooh u wa ini i leh daw ktah ko ya i yoh kaam yoh jam wei daw ktah ya i bhah puræ ki khynroo khyllood ka jylla ya iwa ym ye u pdiang neibhah wa toh i tyngkheiñ ya i bhah kyrpang wei emkaam i pynche na ka chnat kayi ka “General Category” wa kayi ka “Open Category”.
